Тверь уобалаһын Ржев куорат 800 сыллаах тэрээһинигэр Нам улууһуттан «Нам улууһа» МТ депутаттарын Сэбиэтин бэрэссэдээтэлэ Иван Попов салайааччылаах делегация кыттыыны ылла.
Москваҕа тиийэн Лена Максимовна Аммосованы көрүстүлэр. Кини улуус сонунун туоһуласта, эһиилги Максим Кирович Аммосов үбүлүөйдээх сылыгар бэйэтин көрүүлэрин, баҕа санаатын эттэ.
Ржевкэ баран иһэн Филькино селоҕа баар Михаил Петухов саха буойуттарыгар анаан оҥорбут скверигэр сылдьан, биир дойдулаахтарыгар сүгүрүйэн аастылар, онно Петр Григорьевич эһэтин аатын көрөн, олуһун долгуйда. Онтон Победа сэлиэнньэтигэр тиийэн, Нам аатынан уулуссаны аныылларыгар уурбут сымара тааска сырыттылар, уулуссаны көрдүлэр.
«Онтон Ржев куоракка тиийэн үөрүүлээх тэрээһиннэригэр кытынныбыт. Биир сөхпүппүт диэн, күрэхтэһиилэрин көрүҥэр мас-рестлинг киирэ сылдьар. Онно ыҥыраннар биһиги күрэхтэһии үөрүүлээх аһыллыытын көрдүбүт. Куорат дьаһалтатын кытта көрсөн араас хайысхалаах үлэлэри, инники былааннары торумнаатыбыт. Онтон биирдэстэринэн биир дойдулаахпытыгар, ЯАССР уонна СӨ культуратын үтүөлээх үлэһитигэр Михаил Петуховка анаан мемориальнай дуоска оҥорор туһунан кэпсэтии буолла» — диэн Иван Попов кэпсээтэ.
Делегация састаабыгар «Ленскэй нэһилиэк” МТ баһылыга Андрей Новгородов, полиция ветерана, подполковник, «Модут нэһилиэгэ” МТ баһылыга Петр Сокольников уонна «Эр санаа» орден кавалера, “За службу на Кавказе”, “Ветеран боевых действий” мэтээллэр хаһаайыннара, бойобуой дьайыылар бэтэрээннэрин ассоциациятын чилиэнэ Павел Оконешников киирэн үлэлээтилэр.
