Нам 2 №-дээх орто оскуолатын 450 миэстэлээх саҥа дьиэтин тутуу үлэтэ саҕаланара чугаһаата. Онно бэлэмнэнии үлэлэр номнуо тэриллэллэр, СИА-ҕа суруйда «Нам улууһа» МТ пресс-сулууспата.
Бүгүн, ыам ыйын 25 күнүгэр, Саха Өрөспүүбүлүкэтин судаарыстыбаннай сакаасчыт сулууспатын генеральнай директорын эбээһинэһин толорооччу Дмитрий Иванов, «АЭБ Капитал» ХЭТ генеральнай директора Игорь Борисов, солбуйааччыта Надежда Винокурова, «АЭБ Капитал» ХЭТ 2 №-дээх тутуу управлениетын начальнига Андрей Михайлов улуус баһылыга Юрий Слепцову кытта көрсөн, үлэ барылын тула мунньахтаатылар. Мунньахха үөрэх управлениетын, тутуу үлэтигэр быһаччы кыттар тэрилтэлэр салайааччылара, эппиэттээх сирэйдэр кыттыыны ыллылар.
Бастакынан, биллэн турар, билиҥҥи И.Д. Винокуров – Чаҕылҕан аатынан Намнааҕы алын сүһүөх оскуола, аттыгар турар эргэ баһаарынай дьиэтин көтүрүү буолар. Онуоха уот, сибээс, киин ититэр ситимнэрин араарыы, туоратыы ыытыллар. Бу күннэргэ оскуола бүттүүн көһөн тахсан, көтүрүү үлэтин бэс ыйын 1 күнүттэн саҕалыахха диэн быһаардылар.
Улуус баһылыга Юрий Слепцов түргэнник бииргэ алтыһан, быһаарсан үлэни уталыппакка саҕалыылларыгар эттэ. Ону сэргэ үлэ саҕаланнар эрэ, хайаан даҕаны Ленскэй нэһилиэк уонна улуус общественнай сэбиэттэрэ күүскэ хонтуруол ыыталларыгар сорудахтаата.
Мунньах кэнниттэн тутуллар объект сирин-уотун, уот, сибээс, киин ититии ааһар ситимнэрин көрдүлэр, хайдах быһыылаахтык үлэ барыан кэпсэттилэр. Онон, сотору кэминэн күүтүүлээх оскуолабыт бастакы сыбаайата түһэн, күүстээх тутуу үлэтэ ыытыллан, баҕа санаабыт сотору кэминэн туолуоҕа диэн эрэнэбит.
