Аллараа Бэстээххэ Саха Өрөспүүбүлүкэтин Экологияҕа, айылҕа баайын туһаныыга уонна ойуур хаһаайыстыбатыгар миниистирэ Сахамин Афанасьев тахсан үлэлээтэ. Ол туһунан Мэҥэ Хаҥалас улууһун баһылыга Николай Старостин инстаграм сирэйигэр суруйда https://www.instagram.com/nikolaystarostin71/
Миниистир Сахамин Афанасьев Аллараа Бэстээххэ сууккаҕа 200 кубометр туттуллубут убаҕаһы ыраастаан аһарар ыстаансыйа үлэтин көрдө. Бу бырайыак тулалыыр эйгэни, дьон олоҕун харыстааһыҥҥа ураты суолталааҕын, ыстаансыйа атын улуустарга холобур буоларын бэлиэтээтэ.
Маны тэҥэ Аллараа Бэстээх кытылын бөҕөргөтүү үлэтин билистэ. Улуус олоҕор-дьаһаҕар бөһүөлэк кытылын бөҕөргөтүү биир уталыйбат соругунан буолбута балачча ыраатта. Бу кыһалҕаны быһаарыыга судаарыстыба өттүттэн хамсааһын тахсан, Арассыыйа киин былааһын кытта кэпсэтии баран, үбү-харчыны көрүү боппуруоһа быһаарыллан, Аллараа Бэстээх туһаайыытынан кытылы бөҕөргөтүү үлэтэ 2017 сылтан саҕаламмыта. Былаан быһыытынан бу үлэ быйыл түмүктэниэхтээх.
Салгыы улуус дьаһалтата мунньахтыыр саалатыгар быйылгы халаан уута улууспут сиригэр хоромньута суох ааһарыгар, ойуур баһаарын сэрэтиигэ туох үлэ бара турарын билистэ. Видео сибээһинэн Ууга сыһыаннаһыы уонна экологическай сырдатыы Департаменын салайааччыта Зинаида Васильева, Саха Өрөспүүбүлүкэтигэр нэһилиэнньэҕэ Олоҕу-дьаһаҕы хааччыйыыга уонна сиргэ-уокка куттал суох буолуутугар Судаарыстыбаннай кэмитиэт бастакы солбуйааччыта Иннокентий Андросов, «Упрмелиоводхоз» салайааччытын бастакы солбуйааччы Михаил Лоскин, Ойуур харыстабылын Департаменын начаалынньыгын солбуйааччы Иннокентий Кычкин иһитиннэрии оҥордулар.
«Мэҥэ Хаҥалас улууһугар халаан уутун аһардыыга, ойуур баһаарыттан сэрэтиигэ туох үлэ ыытыллыбытын уонна ыытылла турарын сырдаттым. Сахамин Миланович Афанасьев улууспутугар бүгүҥҥү үлэтин Аллараа Бэстээх № 1‒дээх оскуолатын педколлективын кытары көрсүһүүнэн түмүктээтэ уонна улуус экология эйгэтигэр үлэтин үрдүктүк сыаналаан, “Якутлесресурс” Саха Өрөспүүбүлүкэтин судаарыстыбаннай автономнай тэрилтэтин Мэҥэ Хаҥаластааҕы филилалыгар ойуур баһаарын умулларарга аналлаах ТЛ-4 тыраахтары, ТЛ-4 гусеницалаах массыынаны (ДТ-75), ыарахан таһаҕаһы тиэйэр полуприцептаах КАМАЗ массыынаны, Газель микроавтобуһу ылар сертификаты туттарда, — диэн суруллар сонуҥҥа.
