Бүгүн, атырдьах ыйын 1 күнүгэр, Майа сэлиэнньэтин Д.Ходулов аатынан Култуура киинигэр Ытык сирбит – Кыайыы Монуменын чөлүгэр түһэрии «Кыайыы аартыга» бырайыагын тула нэһилиэнньэни кытта аһаҕас кэпсэтии ыытылынна, диэн Мэҥэ Хаҥалас дьаһалтатын пресс-сулууспата суруйар.
Санатан эттэххэ, бу бырайыак Уһук Илиҥҥи регионнарга «Куорат табыгастаах эйгэтин тэрийии» федеральнай бырагыраама иккис куонкуруһун гранын сүүйэри ситиспитэ.
Кэпсэтиини улуус баһылыга Дмитрий Тихонов, Майа сэлиэнньэтин баһылыга Алексей Неустроев, оройуоннааҕы архитектура уонна градостроительство салалтатын салайааччыта Мария Егорова салайан ыыттылар.
Бырайыак ис хоһоонун, туох тупсарыы киирэрин сырдаттылар.
Ол курдук саҥа, тупсарыллыбыт Кыайыы Монуменыгар Кыайыыны уһансыбыт буойуттарга анаан тоҕус көтөн иһэр туруйалар композициялара, амфитеатр, фонтан, атыы-тутуу киинэ, спортивнай туттар сэби-сэбиргэли уларсар прокат, бары кэмнэргэ Ийэ Дойдуну көмүскээбит буойуттарга анаан стеллалар, мемориаллар, көҕөрдүү, сибэкки олордуута, түүҥҥү уотунан сырдатыы уо.д.а. элбэх кэрэхсэбиллээх саҥа сүүрээннэр баар буолаллара былааннанар.
Майа олохтоохторо, уопсастыбаннаһа бырайыагы сайыннарыыга бэйэлэрин санааларын эттилэр, тус көрүүлэрин үллэһиннилэр.
Ол курдук, бу ытык сир чахчы чуумпуруу, сүгүрүйүү миэстэтэ буолуон, дьоһун түөлбэ быһыытынан төгүрүччү күрүөлээх-хаһаалаах, көҕөрдүүлээх-сибэккилээх буолуон, улуус олохтоохторугар, ыалдьыттарыгар анаан араас буклеттар, дойдубут устуоруйатын кэпсиир айымньылар, быыстапкалар, тумус туттар дьоммут хаартыскаларынан галерея, оройуон устун туристическай маршруттары ыйар-кэрдэр сирдьиттэр баар буолуохтарын баҕардылар.
Аҕам саастаах дьон бу ытык сир ураты суолталааҕын бэлиэтээн туран, монумеҥҥа киириигэ дириҥ ис хоһоонноох, киһини толкуйдатар музыка арыала баар буолара ордук тоҕоостооҕун туһунан бэлиэтээтилэр уонна онтон да атын бииртэн биир үтүө этиилэри киллэрдилэр.
Аһаҕас кэпсэтии кэнниттэн салайааччылар уонна олохтоохтор этиллибити барытын боротокуоллан, болҕомтоҕо ылан олоххо киллэрэргэ диэн түмүккэ кэллилэр.
2025 сылга, ыам ыйын 9 күнүгэр, монумеммыт саҥалыы киэркэйэн, тупсан Улуу Кыайыы үбүлүөйдээх 80 сылын өрөгөйдөөхтүк көрсөрбүт күүтүллэр!
Мэҥэ Хаҥалас улууһун дьаһалтатын пресс-сулууспата
