21 От ыйа 21.07
  • 25°
  • $ 88,02
  • 96,04

Кулун тутар 1 күнүттэн ОДьКХ төлөбүрэ үрдүө дуо?

Фото: пресс-служба ГУП "ЖКХ РС(Я)"
Читайте нас на
Яндекс Новости
ЯДВ

“Коммуналка” төлөбүрэ Арассыыйа сорох олохтоохторугар кулун тутар 1 күнүттэн үрдүөҕэ диэн сонун бу күннэргэ Интернет ситимин тилэри көттө. Дьон-сэргэ биллэн турар, бу сонуну сөбүлүү истибэтилэр. Ол иһин СИА кимнээххэ төлөбүр суумата улаатарын Саха сиринээҕи ОДьКХ министиэристибэтиттэн уонна олохтоох Госкомцен биэдэмистибэттэн туоһуласта.

Санатан эттэххэ, уопсай наадаҕа туһаныллар коммунальнай ресурсаларга дьиэни-уоту бас билээччилэр кулун тутар 1 күнүттэн чахчы төһөнү туттубуттарынан олоҕуран төлүөхтэрэ. Маныаха, төһө уу-хаар, уот-күөс туттулубутун туоһулуур счетчик баар буолуохтаах, оттон суох буоллаҕына, уларыйбыт нормативтарга олоҕуран төлүөхтэрэ. Туһааннаах уларытыылары бырабыыталыстыба элбэх кыбартыыралаах дьиэлэргэ баайы-дуолу туһаныыга коммунальнай өҥөнү уонна ресурсалары туһаныыга нормативтары быһаарыы быраабылатыгар киллэрдэ диэн «Парламентская газета» таһаарыыга, РФ ОДьКХ кэмитиэтин солбуйааччы Светлана Разворотнева иһитиннэрбитэ. Манна, ОДН-ҥа (дьиэ уопсай туһанар өҥөлөрө) биирдиилээн ороскуоту учуоттуур прибордар көрдөрүүлэринэн эбэтэр нормативтарынан быһаарыахтара. Бастакы түбэлтэҕэ ороскуоту дьиэҕэ олорор дьон төһө иэҥҥэ олороллорун көрөн үллэриэхтэрэ, диэн чуолкайданар.

Кулун тутар 1 күнүттэн коммунальнай өҥөлөргө тарифтар үрдээбэттэр, сыана ахсынньы 1 күнүттэн үрдээбитэ уонна 2024 сыл от ыйын 1 күнүгэр диэри уларыйыа суоҕа”, — диэн Госкомцен пресс сулууспата эппиэттээтэ. Тустаах иһитиннэриигэ тарифтары үрдэтии буолбакка, нормативтары көннөрүү боппуруоһа турар. Коммунальнай өҥөлөрү туһаныы нормативтара ОДьКХ боломуочуйаларыгар киирэллэр, онон кинилэртэн чопчу туох уларыйыы буоларын чуолкайдыахха сөп. Тариф чааһыгар туох да уларыйыы суох буолуоҕа, диэн тоһоҕолоон бэлиэтээтилэр.

Олохтоох ОДьКХ министиэристибэтин пресс сулууспатыгар саҥа уларыйыыларынан тариф кимиэхэ төһө үрдүүрүн туһунан сонуну кулун тутар чугаһыгар биэриэхпит диэн эрэннэрдилэр. Билигин бу туһунан тугу эмэ чопчулуур кыахтара суоҕун эттилэр.

Следите за самым важным и интересным в Telegram-канале и WhatsApp-группе ЯСИА