25 Ыам ыйа 25.05
  • -7°
  • $ 104,68
  • 115,6

Ил Дархан Айсен Николаев Үлэ уонна Маай бырааһынньыгынан эҕэрдэлиир

10:02, 01 мая 2020
Текст:

Ытыктабыллаах Саха сирин олохтоохторо! Саха Өрөспүүбүлүкэтин салалтатын уонна тус бэйэм ааппыттан эһигини ыам ыйын 1 күнүнэн – Үлэ уонна Маай бырааһынньыгынан эҕэрдэлиибин!


Үлэ уонна Маай бырааһынньыга сыл ахсын өрөспүүбүлүкэбит элбэх омуктаах олохтоохторун, бары эйгэҕэ уонна салааҕа күргүөмнээх үлэлэринэн, ситиһэр кирбиилэринэн, дьоҕурдарынан, үлэҕэ эппиэтинэстээх сыһыаннарынан төрөөбүт өрөспүүбүлүкэлэрин уонна Улуу Россияны аатырдар араас идэлээх дьону түмэр, көлүөнэни ситимниир. Сахабыт сирин олохтоохторо аҕа көлүөнэ үтүө үгэһин салҕаан таһаарыылаахтык үлэлииллэр, оҕо-сиэн бүөбэйдииллэр, дойдубут инники кэскилин түстүүллэр.

Саха сирин олохтооҕун мындыр толкуйа, сытыы өйө, айар-тутар кыаҕа, томороон тымныылаах, өҥүрүк куйаастаах тыйыс дойдуга дьоллоох олоҕу олорор, үлэлиир-хамсыыр үөрүйэҕэ аан дойдуга мэлдьи аатырар.

Күүрээннээх үлэлэринэн, кыайыыга көҕүлүүр дьулуурдарынан өрөспүүбүлүкэ социальнай-экономическай сайдыытыгар үтүө түмүктэри ситиспит, бигэ олоҕу түстэспит дьоруой уонна үлэ бэтэрээнин үрдүк аатын сүгэр, үтүө суобастаах үлэлэринэн, үрдүк сатабылларынан уордьаннарынан, мэтээллэринэн уонна судаарыстыбаннай наҕаараадаларынан бэлиэтэммит биир дойдулаахтарбытынан киэн туттабыт. Үлэһит дьиэ кэргэн үйэлээх үгэһин тэрийсэр, көлүөнэ утумнаах санаатын түстүүр өрөспүүбүлүкэбит үлэһит династияларын уруйдуох тустаахпыт.

Ааспыт сылларга ыам ыйын 1 күнүнээҕи демонстрация өрөспүүбүлүкэҕэ бүтүннүүтүгэр: тыа сирин бары сэлиэнньэлэригэр, промышленнай оройуоннарга, бөһүөлэктэргэ уонна куораттарга сылын аайы уонунан тыһыынчалыы үлэ кэлэктииптэрин, ыччаттар уонна устудьуоннар тэрилтэлэрин, идэлээх сойуустар холбоһуктарын, бэтэрээннэри уонна оскуола оҕолорун түмэрэ. Киин куораппыт – Дьокуускай – үлэлээн иитиллээччилэр күргүөмүнэн хаамыыларыгар дьон-сэргэ көхтөөх кыттыытынан Уһук Илиҥҥи куораттар ортолоругар инники күөҥҥэ сылдьара.

Быйыл ыам ыйын 1 күнэ дойду үрдүнэн бырааһынньыктааҕы демонстрацията да, күргүөмүнэн хаамыыта да, күүлэйэ да суох ааһыаҕа. Ол оннугар бырааһынньык тэрээһинэ аан бастаан сибээс аныгы технологияларын көмөтүнэн саҥалыы көрүҥүнэн ыытыллыаҕа. Коронавирус сыстыганнаах ыарыыта тарҕанар куттала суоһаабытынан, бары этэҥҥэ буоларбыт туһугар куораттарбыт уонна бөһүөлэктэрбит уулуссаларыгар уонна болуоссаттарыгар ким да тахсыбатаҕына табыллар. Бу бырааһынньыгы чугас дьоммутун кытта дьиэбитигэр ыларбыт оруннаах. Өрөспүүбүлүкэбит эрэ буолбакка, дойдубут бүтүннүүтэ кутталлаах ыарыыны утары охсуһар уустук кэмигэр туора турбакка, хаһааҥҥытааҕар даҕаны түмсүүлээх буолуохтаахпыт.

Биһиги бүгүн медицинэ үлэһиттэригэр, быраастарга уонна сиэстэрэлэргэ, быраабы араҥаччылыыр уорганнар үлэһиттэригэр, бу бырааһынньык күн үлэлэригэр тахсан инники күөҥҥэ сылдьар олоҕу хааччыйар тэрилтэлэр үлэһиттэрин кэлэктииптэригэр дириҥ махталбытын тиэрдэбит. Бу кутталлаах ыарыыны кыайарбыт-кыайбаппыт билигин хас биирдиибититтэн тутулуктаах. Онуоха биһиги салгыы түмсүүлээх буоларбыт, бэйэбит уонна чугас дьоммут доруобуйаларыгар эппиэтинэстээхтик сыһыаннаһарбыт ирдэнэр. Ыарахаттартан чаҕыйбакка, бары биир сомоҕо буолан, бу кутталлаах ыарыыны кыайыахпыт, үгэс буолбут күннээҕи олохпутугар эргиллиэхпит диэн бигэ эрэллээхпин.

Күндү доҕоттор! Ыам ыйын 1 күнүнэн эһиэхэ хас биирдиигитигэр чөл туругу, дьолу, этэҥҥэ буолууну, эйэни уонна бары үтүөнү баҕарабын!

Саха Өрөспүүбүлүкэтин Ил Дархана А.С. Николаев

Следите за самым важным и интересным в Telegram-канале и WhatsApp-группе ЯСИА
0
0