СӨ Бэрэсидьиэнин 2011 сыл бэс ыйын 25 күнүнээҕи ыйааҕынан, сэтинньи 30 күнэ Хомус күнүнэн биллэриллибитэ. Быйылгы “Олоҥхо дойдутун хомуһа” киэһэҕэ Суорун Омоллоон аатынан тыйаатыр саалатын толору кэриэтэ мустубут дьон кэпсэтэллэрин иһиттэххэ уонна сырдаабыт сирэйдэрин көрөн сирдэттэххэ, тэрээһин олус табылынна.
Быйыл Хомус күнүн үөрүүлээх тэрээһинэ сэтинньи 30 күнүгэр Суорун Омоллоон аатынан Опера уонна балет судаарыстыбаннай тыйаатырыгар буолан ааста.
Дьоро киэһээ Н.Петров салайааччылаах саха үстүрүмүөннэрин аркыастырын хомуска анаммыт дьүһүйүүтүнэн саҕаланна.
Мустубут дьону, хомусчуттары, хомус уустарын, хомуска сүгүрүйээччилэри эҕэрдэлээтилэр: СӨ Ил Түмэнин бэрэссэдээтэлэ А.Н. Жирков, СӨ Бырабыыталыстыбатын бэрэссэдээтэлин солбуйааччы М.Д. Гуляев, СӨ култуураҕа уонна духуобунай сайдыыга миниистирэ В.И. Тихонов.
Бу киэһэ хас да киһи үрдүкү наҕараадаҕа тигистэ. Култуура уонна ускуустуба эйгэтигэр үтүөлэрин уонна өр сыллаах кыһамньылаах үлэлэрин иһин, СӨ Ил Түмэнин Бочуоттаах кыраамататынан Макарова Августа Петровна, СӨ Ил Түмэнин Махтал суругунан Варламова Елизавета Егоровна наҕараадаланнылар.
Хомус үгэһин харыстааһыҥҥа, сөргүтүүгэ, сайыннарыыга, киэҥ эйгэҕэ тарҕатыыга, норуоту сомоҕолуурга улахан кылаатын иһин, Саха сирэ Арассыыйа састаабыгар киирбитэ 385 сыллаах үбүлүөйдээх бэлиэтэ М.К. Аммосов аатынан ХИФУ бэрэпиэссэрэ, Хомус аан дойдутааҕы киинин бэрэсидьиэнэ Иван Егорович Алексеев-Хомус Уйбааҥҥа туттарылынна.
Култуура уонна духуобунай сайдыы миниистирэ Владимир Иванович Тихонов хомус муусуката сайдыытыгар дьоһун кылааты киллэрэ сылдьар дьону бэлиэтээтэ. “Саха Өрөспүүбүлүкэтин култууратын туйгуна” Бочуоттаах ааты ыллылар Бүлүү улууһун Дьөккөн нэһилиэгин “Сарыал” Култуура киинин дириэктэрэ, “Хомусчаан” ансаамбыл салайааччыта Айаал Ильич Дмитриев уонна Аан дойду норуоттарын хомуһун киинин уонна түмэлин үлэһитэ Николай Евсеевич Жирков. Маны сэргэ миниистир Махтал суругун Башкортостантан ыалдьыттыы кэлбит аан дойду виртуоз-хомусчута (башкирдар “кубыз” дииллэр) Миндигафур Миндиахметович Зайнетдиновка туттарда.
Хомус күнүгэр Опера уонна балет тыйаатыра хомус дьүрүскэнинэн туолла. Саха сирин араас улууһуттан уонна киин куоратыттан элбэх хомусчут, хомус ууһа кытынна.
Николай Аржаков-Боло Уус салайааччылаах хомус уустарын ансаамбыла, саха хомуһун үрдүк чыпчаалга таһаарбыт Альбина Дегтярева, быйыл хас да ыһыахха чулуу хомусчут аатын ылбыт Эркин Алексеев, “Хомус Куо” диэн дьоһун ааттаах Василена Шарина уонна Анна Саввина, “Хомусчаан”, “Этигэн Хомус”, “Дьүрүл”, “Дэгэрэҥ”, “Эйээр”, “Кыл Саха” ансаамбыллар уо.д.а. саха хомуһун бары кыаҕын көрдөрдүлэр.
Сахаттан аан бастакынан Москубаҕа тиийэн хомустаабыт Лука Николаевич Турнин аатынан анал истипиэндьийэни быйыл бэһис төгүлүн туттардылар. Быйылгы лауреат аатын Арыйаана Михайлова ылла уонна 30 тыһ. солк. суумалаах сэртипикээти тутта.
Бу кэннэ Л.Турнин истипиэндьийэтин араас сылларга ылбыт оҕолор оонньоотулар. Бары да ааттара талбыт курдук – Ньургун, Айтал, Токуйаана, Арыйаана.
Клавдия уонна Герман Хатылаевтар ырыалара сэргэхситтэ. Хомуска бүтүн дьиэ кэргэнинэн, аймаҕынан олохторун анаабыт Шишигиннэр оонньууларын дьон уруйдуу көрүстэ.
Аан дойду виртуоз-хомусчута Миндигафур Зайнетдинов бастаан мас хомуһунан саҕалаата, үрэр тээбирининэн салҕаата уонна тимир хомуска оонньоон түмүктээтэ. Бу кэннэ киниэхэ саха виртуозтара Николай Шишигин уонна Альбина Дегтярева кыттыһан, дьикти дьүрүскэни түһэрдилэр.
Хомус аан дойдутааҕы киинин уонна түмэлин дириэктэрэ Николай Спиридонович Шишигин мустубут дьону Хомус күнүнэн эҕэрдэлээтэ. Ол кэнниттэн дьоро киэһэ Хомус оһуокайынан түмүктэннэ. Оһуокайы бастакынан Хомус Уйбаан таһаарда.
