Англияҕа ыытыллыбыт кондитер-декоратордар аан дойдутааҕы «Cake International 2020» күрэхтэригэр Саха сириттэн Хаарчаана Иванова Олоҥхо матыыбынан киэргэтиитэ үрдүк сыанабылы ылла.
Кондитер-декоратордар күрэхтэрэ аан дойдуга бастыҥынан биллэр. Пандемиянан сибээстээн күрэх быйыл тэйиччиттэн ыытыллыбыт. 59 дойдуттан барыта 800 күрэхтэһээччи кыттыбыт.
Хаарчаана үлэтин балаҕан ыйын бүтүүтэ ыыппыт. Кини «декоративнай композиция» категорияҕа кыттыбыт. Хаарчаана саахарынай паастаттан оҥорбут композицията кыһыл көмүһү ылбытын туһунан бэйэтин Instagram сирэйигэр суруйар.
«Мин композициябар икки дойду охсуһуута ойууланар. Орто дойду бухатыыра Ньургун Боотур аллараа дойду биир күүстээх абааһытын кытары охсуһар. Бу Олоҥхоҕо ойууланар киирсии бүгүҥҥү күҥҥэ быһаччы сыһыаннаах. Ньургун Боотур курдук, маҥан халааттаах аанньаллар — быраастар, күннэтэ аан дойду үрдүнэн бүрүүкээбит коронавирус дьаҥын кытары охсуһалларын көрдөрөр”, — диир Хаарчаана.
Хаарчаана суруйарынан, күрэххэ композиция амтанын буолбакка оҥоһук көрүҥүн сыаналыыллар.
