Хаҥаласка өрөспүүбүлүкэбит судаарыстыбаннаһа үөскүүрүгэр олук уурбут дьоммут Софрон Сыранов, Алексей (Сэһэн) Аржаков уонна Илья Шадрин олохторун, уопсастыбаннай үлэлэрин туһунан дьоһуннаах кинигэ сүрэхтэннэ. Саха АССР 100 сылын көрсө тахсыбыт саха бастакы интеллигенциятын төрүттээччилэрин туһунан саҥа таһаарыы ааҕааччы киэҥ араҥатыгар ананар.
Хаҥалас улууһун баһылыга Олег Иринеев:
— Саха бэйэтин бэйэтэ дьаһанан олоруутугар, салайыныытыгар Россия ыраахтааҕытыгар тиийэ турууласпыт биир дойдулаахтарбыт үлэлэрин, олохторун туһунан суруллубут кинигэ тахсыбытыттан бары үөрэбит. Саха норуотун кэскилин түстээбит, сирдьит сулус буолбут судаарыстыбаннай, политическай, общественнай деятеллэр суолларын аныгы көлүөнэ дьон дьоһуннук салгыыр соруктаахпыт. Өтө көрөр өркөн өйдөөх, чаҕылхай дьылҕалаах ааспыт көлүөнэ тумус дьонун ааттарын ааттата, ситиһиилэрин ситимин сириэдитэ туруоххайыҥ. Аныгы XXI үйэҕэ өбүгэлэрбит суолларын хаҥатан, чиҥэтэн Хаңалас сирин дьонун-сэргэтин олоҕо чэчирии сайдарыгар биир санаалаах бары күүспүтүн ууран таһаарылаахтык үлэлиэххэйиң. Бүгүҥҥү кинигэ — уус алданнар, хаҥаластар киэн туттуубут!
Кини кинигэ тахсыытыгар, сүрэхтэниитигэр үлэлэспит, сүүрбүт-көппүт, быһаччы кыттыспыт дьоңңо махтал тылын биллэрдэ.
«Предтеча» кинигэ СӨ судаарыстыбаннай Мунньаҕын (Ил Түмэн) бэрэссэдээтэлин солбуйааччы, депутат Александр Жирков бырайыагынан уонна салайыытынан 2016 с. олохтоммут «Национальная интеллигенция и становление государственности народов Якутии» сериянан “Айар” кинигэ кыһатыгар 1000 экз. бэчээттэнэн таҕыста.
Тэрээһиҥҥэ Хаңалас, Уус Алдан улуустарын баһылыктара Олег Иринеев, Алексей Федотов, улуус депутаттарын Сэбиэтин бэрэссэдээтэлэ Анатолий Антонов, Нөмүгү уонна Сиинэ баһылыктара Наум Устинов, Айдан Леверьев, ону сэргэ СӨ Бастакы Президенэ М.Е. Николаев референа Николай Барамыгин, кыраайы үөрэтээччилэр, кинигэҕэ үлэлээбит Юлия Дьячкова, Галина Шадрина о.д.а. кытыннылар. Ону таһынан, интернет ситимин нөңүө элбэх дьон кыттыыны ылла, суруйда “Хаңалас улууһа” МТ пресс-киинэ.
