Үөһээ Бүлүү улууһугар үөрэх управлениета сыл ахсын оҕо сынньалаҥар чэпчэтиилээх путевканан хааччыйар.
Быйыл сайын чэпчэтиилээх путевканан уопсайа 82 оҕо туһаныаҕа.
Дьокуускай куоракка 6 850 солк. төлөбүрдээх «Сосновай бор» оҕо сынньалаҥ лааҕырыгар «Палитра красок», «Суолдьут» диэн ааттаах сезоннарыгар номнуо 19 оҕо сынньанан кэллэ. «Я — инженер» сезоҥҥа 15 оҕо барара күүтүллэр. ХИФУ «Смена» профилакторийыгар, Дьокуускайдааҕы педагогическай колледж «Чэчир» лааҕырыгар уонна «Чэбдик» профилакторий-санаторийыгар 5-тии оҕо барда. Маныаха хас биирдии төрөппүт 5-тии тыһ. солк. усунуос быһыытынан төлөөтө. «Дружба» социальнай хайысхалаах лааҕырга 2 оҕо буор-босхо сынньанна. Бу лааҕырдарга барыы-кэлии ороскуотун төрөппүт толору уйунар.
Сочи куорат лааҕырдарыгар барыы былдьаһык кэриэтэ буолар. Быйылгы сынньалаҥ атырдьах ыйыгар былааннанар. «Манна 19 оҕо барыаҕа, испииһэк номнуо туолан турар. Айан билиэтэ 12-гэр диэри саастаах оҕоҕо 11 700 солк., оттон 12-тэн үөһэ саастаахтарга 15 600 солк. тэҥнэһэр. Путевка суумата 18 500 солк. Ону таһынан улуус дьаһалтата түһэрсибит сөбүлэҥин быһыытынан Кытай республикатыгар сынньана барыы сыллата ыытыллар буолла. Быйыл эмиэ 25 оҕо бараары бэлэмнэнэр. Айан уонна кыраныыссаны туоруур виза оҥотторуутугар уопсайа 35 тыһ. солк. төлөбүрдээх. Оттон лааҕырга сынньаныы босхо», — диэн үөрэх управлениетын иитэр үлэҕэ отдел кылаабынай исписэлииһэ Светлана Харлампьева кэпсээтэ.
