Андрей Григорьев Кремльга наҕараадатын тутан баран төнүннэ. Кыһыл көмүс сулуһу киниэхэ РФ президенэ Владимир Путин туттарбыта, Аҕа дойдуну көмүскээччилэр күннэригэр. Кини дойду салайааччытын кытта биллибэт саллаат мемориалыгар сибэкки уурбута.
«Долгутуулаах этэ. Онно миигин бары билэллэр эбит, оттон мин — боростуой дэриэбинэ киһитэбин. Наҕараадалааһын буолар диэбиттэригэр түргэнник хомунан сөмөлүөтүнэн бастаан Ньурбаттан Дьокуускайга, салгыы Москваҕа көппүтүм. Билигин Ньурбабар барабын, онно эмиэ көрсөллөр, дьоммун кытта көрсүөм. Сотору үлэлиэм этэ», — диэтэ Андрей Григорьев.
«Киэн туттабын. Андрей — дэриэбинэ уола, онно геройдар олороллор, дэриэбинэ ыарахан олоҕун оҕо эрдэхтэн билэллэр. Кини Россия Геройа буолбута дэриэбинэ барытын үтүөтэ. Анал байыаннай дьайыыга барарыгар мин ыараханнык ыыппытым, ытаабакка буола сатаабытым, туттуммутум. Мин уолум кыра уонна ырыган, кини хайаан да тыыннаах эргиллиэхтээҕэ, тоҕо диэтэххэ биэс оҕолоох, таптыыр кэргэннээх, ийэлээх, бырааттардаах. Биһиги кинини тыыннаах кэлэрин күүппүппүт», — диэтэ Россия Геройун ийэтэ Ольга Васильева.
Геройу төрөөбүт сиригэр Россия президенигэр Саха сирин боломуочуйалааҕа Андрей Федотов, Ил Дархан уонна бырабыыталыстыба дьаһалтатын салайааччы Георгий Михайлов, Ил Түмэн ыччакка, спортка сис кэмитиэт бэрэссэдээтэлэ Георгий Балакшин көрүстүлэр.
