29 Кулун тутар 29.03
  • -12°
  • $ 92,26
  • 99,71

«ДАРХАН УУС» дьиҥнээх боотурдар эйгэлэригэр ыҥырар

10:30, 20 февраля 2020
Текст:
Читайте нас на
Яндекс Новости
ЯДВ

«Куруһаала» эргиэн киинигэр үгэскэ кубулуйбут «ДАРХАН УУС» Саха сирин тимир уустарын сүрүн түһүлгэтэ 11-с төгүлүн ыытыллыаҕа. Бу эрэ күннэргэ Туймаада хочотугар сөбүлүү көрбүт оҥоһуккун ханнык баҕарар уустан талан ыларга кыах бэриллэр.


Өссө ааспыт үйэ саҥатыгар саха уһулуччулаах чинчийээччитэ Г.В. Ксенофонтов саха тимирэ – уустар, кинилэр оҥоһуктара уонна атыыһыт айанньыттарбыт саханы саха дэппиттэрин – тыйыс айылҕалаах дойдуга киһи-хара буоларбытыгар тирэх буолбуттарын сэргэ, киэҥ нэлэмэн сирдээбиттэрин уонна албан аатырбыттарын туһунан суруйан турардаах. Аныгы кэмҥэ өбүгэ бу түҥ былыргы дириҥ силистээх-мутуктаах үгэһин, идэтин, дьарыгын сөргүтэр, сайыннарар уонна киэҥ эйгэҕэ таһаарар сүрүн түһүлгэнэн «ДАРХАН УУС» тимир уустарын быыстапката буолар.

Быйыл олунньу 22-23 күннэригэр «Куруһаала» эргиэн киинигэр үгэскэ кубулуйбут «ДАРХАН УУС» Саха сирин тимир уустарын сүрүн түһүлгэтэ 11-с төгүлүн ыытыллыаҕа. Бу эрэ күннэргэ Туймаада хочотугар сөбүлүү көрбүт оҥоһуккун ханнык баҕарар уустан талан ыларга кыах кимиэхэ баҕарар бэриллэр.

Саха сирин сүүрбэччэ улууһуттан 50-ча кэриҥэ тимир ууһа түмсүбүт сүрүн түһүлгэлэрэ «Уус-уран оҥоһуулаах быһах», «Бастыҥ булт быһаҕа», «Бастыҥ ас быһаҕа» хайысхаларга чулууттан чулуулары сүүмэрдээн таһаарыаҕа. «Бастыҥ ас быһаҕа» хайысхаҕа саха төрүт аһын сөргүтээччи Иннокентий Тарбахов бэйэтинэн дьүүллүүр сүбэни салайыаҕа. Онтон атын хайысхаларга саха быһаҕын аар саарга аатырдыбыт Сарыал Билюкин, ураты суоллаах-иистээх Василий Попов-Бааха Уус, СӨ искусствотын үтүөлээх деятела, худуоһунньук Дьулустаан Бойтунов, Экология, айылҕа баайын туһаныы уонна ойуур хаһаайыстыбатын миниистирин солбуйааччы Николай Додохов дьүүллүүр сүбэҕэ үлэлиэхтэрэ.

Быйылгы быыстапка бэлиэ түгэнинэн саха уустарын тумус туттар киһилэрэ Мандар Уус 75 сааһын көрсө күрэс биир кыттааччыта анал бириискэ тиксиэҕэ. Быыстапканы төрүттээччинэн күөгэйэр күнүгэр суох буолбут предприниматель уонна меценат С.В. Попов буолбут эбит буоллаҕына, кини сүбэһитэ Саха Өрөспүүбүлүкэтин тимир уустарын сойууһун бэрэссэдээтэлэ, Духуобунас академиятын академига, П.А. Ойуунускай аатынан судаарыстыбаннай бириэмийэ лауреата Борис Неустроев-Мандар Уус буолар. Саха тыллаах барыта ытыктыыр киһитэ Борис Федорович быйылгы 75 сааһын көрсө, «ДАРХАН УУС» быыстапка кини араас кэмҥэ уһаммыт бастыҥ оҥоһуктарын тутан-хабан көрөргө тоҕоостоох түгэни бэлэхтиир.

© edersaas.ru сайтан: http://edersaas.ru/darhan-uus-di-neeh-booturdar-ejgeleriger-y-yrar/

Следите за самым важным и интересным в Telegram-канале и WhatsApp-группе ЯСИА