Бүгүн чахчы даҕаны Чурапчы киинигэр, дьон-сэргэ олус өр күүппүт-кэтэспит устуоруйаҕа киирэр долгутуулаах биир бэлиэ күн үүннэ.
СӨ Ил Түмэн Судаарыстыбаннай мунньаҕынан, 2012 сыл ахсынньы 15 күнүгэр ылыллыбыт 1154-З N 1201-IV нүөмэрдээх “Тулаайах уонна төрөппүт көрүүтэ – истиитэ суох хаалбыт оҕолору дьиэнэн хааччыйыы” сокуон чэрчитинэн, Чурапчы улууhугар маннык уустук дьылаҕалаах оҕолору дьиэнэн хааччыйыыга ситимнээх, былааннаах үлэ ыытыллар.
Ол курдук, 2010 сылтан саҕалаан 2025 сылга диэри барыта холбоон 97 тулаайах оҕо дьиэнэн хааччылынна уонна олох сайдыытын чэрчитинэн толору хааччыллыылаах дьиэлэр бэрилиннилэр.
Бэлиэтээн эттэххэ, хас сыл аайы Чурапчы улууһа тулаайах оҕолору дьиэнэн хааччыйыыны 100% толорон иһэр.
Бу бырагыраама иитинэн бүгүн 3 хаһаайын саҥа дьиэ күлүүһүн долгуйа туттулар. Дьиэни “Восток-Строй” хааччахтаммыт эппиэтинэстээх тэрилтэ, генеральнай дириэктэр Иннокентий Иванович Пермяков, үөһэ тиллибитин курдук Нерюнгри аатынан уулусса, 38 нүөмэрдээх аадырыһыгар үс кыбартыыралаах аныгылыы, толору хааччыллыылаах дьиэ тутан үлэҕэ киллэрдэ.
Саха киһитин сиэринэн, ас амтаннааҕынан аал уоту айах тутан, алгыс маанылааҕын Мария Божедонова-Сэгэлдьийэ түһэрдэ.
Үөрүүлээх чааска дьиэни арыйыыга аалай кыьыл лиэнтэни “Чурапчы улууһа” МО баһылыг тутуу боппуруостарыгар солбуйааччы Афанасий Дьячковскай, “Чурапчы нэьилиэгэ” тыа сирин түөлбэтин баһылыгын бастакы солбуйааччы Уйгулан Туласынов, саҥа дьиэ олохтооҕо Александр Егоров, “Восток-Строй” ХЭТ генеральнай дириэктэрэ Иннокентий Пермяков быстылар.
Харда тылы опекуннар ааттарыттан Раиса Михайловна Топпокова,
саҥа кыбартыыра хаһаайына Александр Сергеевич Егоров эттилэр.
Күлүүстэри “Чурапчы улууһа” МО баһылыгын тутуу боппуруостарыгар солбуйааччы Афанасий Дьячковскай, “Чурапчы нэһилиэгэ” тыа сирин түөлбэтин баһылыгын бастакы солбуйааччытын Уйгулан Туласынов, Чурапчы улууһун опека уонна попечительство отделын салайааччыта Марианна Антипина туттардылар.
Ааптар: Сэмэн ЖЕНДРИНСКЭЙ.
Ааптар хаартыскаҕа түһэриитэ
