24 Ыам ыйа 24.05
  • -7°
  • $ 104,68
  • 115,6

Чурапчы Мырылата биэрэпис былаанын аһары толордо

15:03, 02 ноября 2021
Текст:

Чурапчыттан аҕыс көстөн ордуктаах сиргэ тайаан сытар Соловьев нэһилиэгин биэрэпискэ үлэһитэ Татьяна Петровна Красильникова, суос-соҕотоҕун ыалы барытын кэрийэ сылдьан тустаах планшетыгар 578 киһини бэлиэтээтэ.

Туруоруллубут былааны аһары толордо! Сорох дьон “Госуслуги” портал нөҥүө киирэн анал анкетаны толорон бэлиэтэммиттэр. Биэрэпискэ Мырыла кырдьаҕас олохтооҕо, 96 саастаах Мария Ивановна Сибирякова биир бастакынан кыттыыны ылла.

Биһиги нэһилиэкпитигэр Бүтүн Арассыыйатааҕы биэрэпискэ бэлэмнэнэн былааннаах үлэ эрдэттэн ыытыллыбыта. Манна даҕатан эттэххэ Татьяна Петровна олус үчүгэйдик, эппиэтинэстээхтик ылсан үлэлээтэ, күн аайы хас ыалга сылдьыбытын, төһө киһи бэлиэтэммитин бэйэбэр киирэн хайаан даҕаны отчуоттуура. Инньэ гынан нэһилиэгим, Хахыйах учаастагын дьонугар-сэргэтигэр буолбут биэрэпискэ болҕомтолоохтук сыһыаннаһан кыттыбыттарыгар дириҥник махтанабын. Биэрэпис үлэтэ хайаан даҕаны үрдүктүк сыаналаныахтаах онон Татьяна Петровнаны улахан үлэни ыыппытынан тус бэйэм ааппыттан итиитик-истиҥник эҕэрдэлиибин”, — диэн Соловьев нэһилиэгин баһылыга Мария Кронникова бэйэтин санаатын эттэ.

Эбэн эттэххэ, Татьяна Петровна бу иннинэ атырдьах ыйыгар ыытыллыбыт Тыа хаһаайыстыбатын биэрэпиһигэр эмиэ бэрт кыһамньылаахтык үлэлээбитин бэлиэтээн аһарбыттаахтара.

Саҥа олох

Следите за самым важным и интересным в Telegram-канале и WhatsApp-группе ЯСИА
0
0