29 Кулун тутар 29.03
  • -13°
  • $ 92,26
  • 99,71

Булт билиэтин ылыы уустугуруо

13:01, 26 октября 2020
Текст:
Читайте нас на
Яндекс Новости
ЯДВ

Булт билиэтин аан бастаан ылааччылар булт быраабылатын билиигэ тургутугу ааһар буолуохтара. Маныаха булт сэбин туттууга уонна харайыыга көҥүл ылбыт киһи төлөбүрдээх куурус баран, эксээмэн туттаран, булт билиэтин ылар буолуоҕа. Сокуон барылын айылҕа харыстабылын министиэристибэтэ булт кэмигэр оһоллонууну кыччатар сыаллаах бэлэмнээбит. Бу туһунан «Парламентская газета» суруйар.


2009 сыллаахха «Булт туһунан» сокуон ылыллыбытыгар гладкоствольнай сааҕа лиссиэнсийэни булт билиэттээх эрэ бары ылыан сөп буолбутун туһунан Госдума экологияҕа уонна тулалыыр эйгэни харыстааһыҥҥа кэмитиэтин бэрэссэдээтэлин бастакы солбуйааччы Николай Валуев санатар.

«Ити саалаах булчут ахсаанын элбэппитэ. Бу дьон иллэҥ кэмнэригэр булт ис дьиҥин билбэккэ эрэ сааланалларыгар тиэрдэр. Мантан сылтаан үгүс кыһалҕа, ол иһигэр итирик туруктаах сааланыы тахсар», — диир дьокутаат.

Булт билиэтэ — бултуон баҕалаах киһи бастакы сүрүн докумуона. Билиэти сокуон иннигэр толору эппиэтинэһи сүгэр кыахтаах дьоҥҥо биэрэллэр. Баҕалаах киһи сайабылыанньа суруйан, дойду бары сирдэригэр бултуурга көҥүл биэрэр, болдьоҕо суох билиэти ылар кыахтаах. Сокуон барылынан билиэти ылааччы булт быраабылаларын билэр буолуохтаах.

«Ол эрэн бүгүн баар чахчынан булчут булт быраабылаларын билэрин туһунан кумааҕыга илии эрэ баттыыр», — диэн айылҕа харыстабылын министиэристибэтин үлэһитэ Андрей Филатов этэр.

2017 сыллаахха бэрэсидьиэн Владимир Путин ити кыһалҕаны быһаарары сорудахтаабыта. Онуоха айылҕа харыстабылын министиэристибэтэ билиэти ылыах иннинэ булт быраабылаларын билиигэ сокуон барылын бэлэмнээбитэ.

Министиэристибэ булт сүрүн быраабылаларын өссө 2011 сыллаахха бигэргэппитэ. Манна куттала суох буолуу тиэхиньикэтэ, булт сэбинэн араас түгэннэргэ туттуу, бастакы көмөнү оҥоруу быраабылалара киирбиттэрэ. Холобур, үчүгэйдик көстүбэт сыалы ытыллыбатын, табаҕа, тайахха 5 мм кэтит доруобу туһаныллыбатын, бааһырбыт кыылы сиргэ хаалларбат туһунан быраабылалар.

«Маны таһынан булчут дьиикэй кыылы көрүҥүнэн, сааһынан, атыырын-тыһытын араарар буолуохтаах. Холобур, куртуйах тыһытын бултуур бобуулаах, оттон атыырын болдьоммут эрэ кэмҥэ бултуур көҥүллээх», — диир Филатов.

Саҥа сокуон барылынан булчут тургутугу электроннай сириэстибэ көмөтүнэн буолбакка «тыыннаахтыы» туттарыахтаах. Булт сэбин туттууга уонна харайыыга көҥүл ылбыт киһи төлөбүрдээх куурус баран, эксээмэн туттаран эрэ баран биирдэ билиэт ылыахтаах диэн, министиэристибэ быһаарар.

Следите за самым важным и интересным в Telegram-канале и WhatsApp-группе ЯСИА