Саха сирин доруобуйатын харыстабылын эйгэтигэр уларытыылар күүтэллэр. Сорох балыыһалар амбулаториялар эбэтэр ФАП-тар статустарын ылыахтара. Ити эрээри быраастары уонна медицина тэрилтэлэрин сарбыйыы былааннаммат, диэн бырабыыталыстыба бэрэссэдээтэлэ Владимир Солодов соцситимҥэ быһа эфир кэмигэр эттэ.
Владимир Солодов бэлиэтээбитинэн, ыраах, суола-ииһэ суох нэһилиэнньэлээх пууннарга биир да социальнай суолталаах тэрилтэ сабыллыа суохтаах. «Кыра бөһүөлэккэ ФАП сабыллан, дьон эмтэнэр кыаҕа суох буолуута таһаарыллыа суохтаах. Оннук хаһан да буолбатаҕа, буолуо да суоҕа», — диэтэ кини.
Ити эрээри билигин хонуктаах куойка ахсаанын аҕыйатыы барар. Онон тэрилтэ дьаһалтатыгар уонна хааччыйар персоналга сарбыйыы таһаарыллыа. Солодов эппитинэн, быраастар ахсааннара эбиллиэ, онон үрдүк үөрэхтээх эмчиттэри ууратыы туһунан сурах олоҕо суох.
«Биһиги бары медицина инникилээн иһэрин билэбит, үгүс көмөнү амбулаторияҕа көрдөрөн ылыахха сөп. Ол иһин Саха сиригэр быһа барыллаан тыһыынча хонуктаах куойка сабыллыахтаах. Ити эрээри маннык быһаарыынан ыраах, суола-ииһэ суох сиргэ олорор киһи бырааска эмтэнэр кыаҕа сүтэр диэн буолбатах. Эмтэнии күнүскү кэмҥэ аныгы оборудованиеҕа ыытыллар«, — диэн кэпсиир Солодов.
Бу үбүлээһини экономиялааһын буолбакка, медицина биэрэр өҥөтүн хаачыстыбатын тупсарыы, тиийимтиэлээх буолуутун хааччыйыы буоларын болҕойон бэлиэтээтэ.
Бырабыыталыстыба бэрэссэдээтэлэ эппитинэн, региоҥҥа дороубуйа харыстабылын хаачыстыбата тупсан иһиэҕэ. Өрөспүүбүлүкэ былааһа федеральнай таһымҥа элбэх көҕүлээһини киллэрэн, кэлэр сылга эбии үп көрүллүөхтээх.
«Биһиги суола-ииһэ суох уонна Арктика кытылынан тайаан сытар улуустарга болҕомтобутун ордук уурабыт. Быраастарынан уонна санавиациянан булгуччу хааччыйыахтаахпыт» — диэн түмүктээтэ Солодов.
