Биир куоластыыр күн – балаҕан ыйын 8 күнүгэр өрөспүүбүлүкэҕэ 79 быыбардыыр хампаанньа былааннанан турар. Ол иһигэр Халыма-Индигиир биир мандааттаах быыбардыыр уокуругуттан Ил Түмэн норуотун дьокутаатын быыбара.
От ыйын 7 күнүнээҕи туругунан Халыма-Индигиир биир мандааттаах быыбардыыр уокуругугар түөрт бэлитиичэскэй баартыйа хандьыдааттарын туруордулар:
— ЛДПР, хандьыдаат Макаров Семен Витальевич, бэс ыйын 27 күнүгэр регистрацияланна;
— Биир Ньыгыл Арассыыйа, хандьыдаат Слепцов Евгений Михайлович;
— Родина, хандьыдаат Швец Александр Сергеевич;
— Новые люди, хандьыдаат Шадрин Вячеслав Иванович.
Хандьытааты туруорарга быыбардааччылар өйөбүллэрин ылбыттарынан, бу түөрт баартыйаҕа илии баттааһыны хомуйуу ирдэбилэ турбат.
Ону таһынан 78 муниципальнай быыбар ыытыллыаҕа, ол иһигэр талыахтара:
Аллайыаха, Аллараа Халыма, Өймөкөөн, Өлүөхүмэ улуустарын (оройуоннарын) уонна Дьокуускай куорат “Жатай” уокуругун баһылыктарын талыахтара;
Аллайыаха, Өлүөхүмэ улуустарын (оройуоннарын) уонна Дьокуускай куорат “Жатай” уокуругун бэрэстэбиитэллээх уорганнарын саҥа ыҥырыытын быыбара;
35 куорат уонна тыа сирин сэлиэнньэлэрин баһылыктарын, о.и. улуус (оройуон) кииннэрэ: Cунтаар, Чурапчы, Уус Маайа, Уус Ньара уонна Орто Халыма куорат;
Белая Гора (Абый улууһа), Уус Маайа (Уус Маайа улууһа) бөһүөлэктэрин, Сиинэ (Хаҥалас улууһа), Хайахсыт (Чурапчы) нэһилиэктэрин бэрэстэбиитэллээх уорганнарын саҥа ыҥырыыларын быыбара.
Сүрүн уонна болдьоҕун иннинээҕи быыбардары тэҥэ, сорох муниципальнай тэрээһиннэр бэрэстээбитэллээх уорганнарын дьокутааттарын хаттаан уонна эбии быыбардара буолуоҕа: Үөһээ Дьааҥы улууһугар 3 мандааты солбуйуу, Үөһээ Халыма, Нам улуустарыгар биирдии мандаат уонна 10 улуус 15 сэлиэнньэтигэр дьокутааттар эбии быыбардара ыытыллыаҕа. Уопсайынан 160 дьокутааты талыахтара.
От ыйын 9 күнүнээҕи туругунан, улуус (оройуон) баһылыктарын быыбарыгар 5 хандьыдаат докумуоннарын туттардылар, о.и. икки хандьыдаат Өлүөхүмэ улууһун баһылыгар. Булуҥ улууһун Тумат нэһилиэгин баһылыгар 1 хандьыдаат, Уус Маайа улууһун киинин баһылыгын быыбарыгар 2 хандьыдаат докумуоннарын туттардылар.
Муниципальнай быыбардарга докумуоннары туттарыы от ыйын 29 күнүнэн түмүктэнэр диэн Саха Өрөспүүбүлүкэтин Киин быыбардыыр хамыыһыйатын бэрэссэдээтэлэ Евгений Федоров от ыйын 9 күнүгэр Ил Түмэҥҥэ ыытыллыбыт муниципальнай тэриллиилэр бэрэстээбитэллээх уорганнарын Сэбиэтин мунньаҕар иһитиннэрдэ, суруйда Алексей Матвеев, Саха парламент саайт.
