«Бүгүн Саха сирин историятыгар элбэҕи уларыппыт лидери төрөтөн, улаатыннаран таһаарбыт Бүлүү сиригэр кэлбитим миэхэ улахан чиэс!» — диэн суруйда Ил Дархан Айсен Николаев бэйэтин телеграм-ханаалыгар.
Гавриил Чиряев төрөөбүт түөлбэтигэр Чочу нэһилиэгэр бүгүн өрөспүүбүлүкэ баһылыга Айсен Николаев судаарыстыбаннай деятель мэҥэ тааһыгар тыыннаах сибэкки уурда.
Айсен Николаев иһитиннэрбитинэн, бүгүн, муус устар 18 күнүгэр, нэһилиэккэ Г.Чиряев аатынан музейы саҥардан, үлэҕэ киллэрдилэр. «30 сыл анараа өттүгэр тэриллибит музей, бүгүн саҥа кэрдиис кэми арыйда. Улахан үлэ барда, хаачыстыбалаах үлэ, кэлэр көлүөнэ билэрин, өйдүүрүн, улуу киһилэринэн киэн туттарын туһугар», — диэтэ регион баһылыга.
