Сайын, окко киирии үгэннээн эрдэҕинэ уһун ардахтар түһэннэр, өрүстэр хааларыттан тахсыбыттара. Онно ордук Сунтаар, Ленскэй, Өлүөхүмэ, Кэбээйи, Эбээн Бытантай, Дьааҥы, Абый, Орто Халыма уонна Муома улуустарын кэккэ нэһилиэктэрэ оҕустарбыттара, суруйда Саха парламент саайт.
Халаан кэнниттэн хаһаайыстыбалар ханна сир тахсарынан оттооһуну тэрийбиттэрэ. Ол түмүгэр, Тыа хаһаайыстыбатын уонна ас-үөл бэлиитикэтин министиэристибэтин чахчытынан, балаҕан ыйын 14 күнүнээҕи туругунан, Өлүөхүмэ улууһа 10 784 туоннаны оттоон, кыстыыр отун 81 %-ын булуммут, ону таһынан 1 685 туонна сиилэһи, 386 туонна сенаһы бэлэмнээбит.
Орто Халыма улууһугар оттооһун туругун туһунан тыа хаһаайыстыбатын управлениетын начаалынньыгын солбуйааччы Мария Шарина маннык кэпсээтэ:
— Улуус үрдүнэн барыта 877 ынах сүөһүлээхпит, 2596 сылгылаахпыт. Күн бүгүҥҥү туругунан, 4 128 туоннаны чөкөтөн, кыстыыр оппут 95 %-ын хааччынныбыт. Ол иһигэр, биирдиилээн нэһилиэктэринэн ыллахха, былааннаах сорудахтарын I Мээтис 90 %, II Мээтис 77 %, Алаһыай 64 %, Хатыҥнаах 60 % , атын нэһиликтэр 100 % толордулар. Өлөөкө Күөллээҕи сылгы собуота 1 414 туоннаны, мобильнай биригээдэлэр 240 туоннаны чөкөттүлэр. Ити курдук, хаһаайыстыбалар кыстыыр отторун син хааччыннылар, ол эрээри, тиэйэр-таһыы боппуруостарыгар уустуктары көрсөллөр, оту нэһилиэк да иһигэр тиэйэр ыарахан.
