Үлэлэргэ РФ бэрэсидьиэнин көмөлөһөөччүтэ, Муора кэллиэгийэтин бэрэссэдээтэлэ Николай Патрушев старт биллэрдэ, бу терминал сир баайын туһаҕа таһаарыыга, хотугу таһаҕаһы тиэйиини итэҕэтиилээх оҥорууга уонна Трансарктическай тырааныспар көрүдүөрүн сүрүн ситимигэр кубулуйуоҕа диэн бэлиэтээтэ.
«Арассыыйа Бэрэсидьиэнин сорудаҕынан Арассыыйа Федерациятын Арктика зонатын уонна Трансарктическай тырааныспар көрүдүөрүн сайыннарыы комплекснай бырайыага оҥоһулла турар. Ньайба Арассыыйа Арктикатын хотугулуу-илин өттүн сайыннарарга, кини баай минерал-сир ресурсаларын туһаҕа таһаарарга уонна хотугу таһаҕаһы тиэйиини итэҕэтиилээх оҥорорго муора тирэх инфраструктурата буолуохтаах», — диэтэ Николай Патрушев.
Эбийиэккэ бастакы тутуу тиэхиньикэтэ кэллэ, причалы тутууга инженернэй чинчийиилэри исписэлиистэр саҕалаатылар. Инфраструктура оператора уонна сүрүн инвестор «Таймыр Инвест» хампаанньа буолар. Бастакы түһүмэх ирдэбиллэригэр анаан бастаан быстах кэмҥэ муора причала тутуллуоҕа, ол сиригэр салгыы өр сыллаах пуорт үөскүөҕэ.
Терминалы үлэҕэ киллэрэр бырайыагынан Кючус кыһыл көмүс рудалаах сирин баһылааһын буолуоҕа. Быстах причал ыарахан бырайыактыыр таһаҕастары ыларга, олору кэлин «Ньайба-Кючус» кыһыҥҥы суолунан илдьэргэ аналлаах буолуоҕа.
