А.Е.Кулаковскай аатынан Норуоттар доҕордоһууларын дьиэтигэр «Азия оҕолоро» Оонньууларга кыттар Кытай, Соҕуруу Корея, Азербайджан, Непал уонна Тыва спортсменнара ыалдьыттаатылар.
Ыҥырыылаах ыалдьыттары сахалыы алаадьынан, кымыһынан күндүлээтилэр. Спортсменнар Саха сиригэр олохсуйан, ууһан олорор омуктар төрүт үгэстэрин кэрэһэлии кэпсиир быыстапкаҕа сырыттылар. Норуоттар доҕордоһууларын дьиэтин салайааччытын бастакы солбуйааччы Розалия Колосова ыалдьыттарга өйдөбүнньүк бэлэхтэри туттарда. Ону таһынан азербайджаннар диаспораларын салайааччытыгар Ильдар Надир-Оглыга, Тыва общинатын салайааччытыгар Зоя Шартан-Оолга махтал суруктары туттарда. Ильдар Надир-Оглы Азербайджан сүүмэрдэммит хамаандатын тренеригэр тоҕус кыайыы иһин Кубогы биир дойдулаахтарын аатыттан үөрүүлээх быһыыга-майгыга туттарда.
Ыалдьыттар «Долгунча» ансамбылы кытта һээдьэлээтилэр, «Ямские бубенцыны» кытта хороводка уонна Буряттар «Ёхор» үҥкүүлэригэр эргийдилэр.
