19 Кулун тутар 19.03
  • -11°
  • $ 91,98
  • 100,24

Амматааҕы норуот айымньытын дьиэтигэр өрөмүөн сэтинньигэ түмүктэниэҕэ

14:57, 19 октября 2021
Текст:
Читайте нас на
Яндекс Новости
ЯДВ

Амма нэһилиэгин Ф.Ф.Потапов аатынан норуот айымньытын дьиэтэ, Арассыыйаҕа «Култуура» национальнай бырайыак кыайыылааҕанан буолбута. Грант көмөтүнэн, бу күннэргэ, көрөөччү саалатын өрөмүөнэ ыытылла турар. Маны таһынан, олохтоох көҕүлээһин бырагыраамматынан, өрөспүүбүлүкэ бүддьүөтүттэн үбүлэнэн, улахан экран кэлэн туруоҕа. Петр Кулаковскай дириэктэрдээх култуура киинэ, көрөөччүлэрин аныгылыы тупсаҕай көрүҥнээх, сылаас, сырдык саалаҕа саҥа үлэ дьылыгар күүтэр.

Олохтоох дьаһалта култуура киинигэр, биир мөлүйүөннээх субсидияҕа балтараа мөлүйүөн харчыны эбии көрөн, аһаҕас халлаан анныгар хомуллар улахан сыананы Нижнэй Новгород Бор куоратыттан, икки сыллааҕыта атыылаһан аҕалбыта. Онтон быйыл федеральнай бырагыраамманан кыайыылаах тахсаннар, көрөөччү саалатын өрөмүөнүгэр 11,800 мөлүйүөн көрүлүннэ. Манна нэһилиэк дьаһалтатын бүддьүөтүттэн 780 тыһ. солкуобайы эбэннэр, улахан өрөмүөн бара турар: сыана муостатын уларытыахтара, көрөөччү саалатын муостатын сылааһы тутар гына оҥоруохтара, паркетынан бүрүйүөхтэрэ.

«274 миэстэлээх саалаҕа эбии 18 миэстэлээх балкон, тыаһы-ууһу, уоту-күөһү салайар исписэлиистэр анал хосторо баар буолуоҕа. Аны 4 мөлүйүөн сууммаҕа анал аппаратура, прожектордар туруохтара, быыс уларыйыаҕа. Олохтоох көҕүлээһин бырагыраамматынан үс мөлүйүөн сууммалаах улахан экран туруоҕа. Тэриллэрбит соҕурууттан айаннаан кэлэллэригэр хааччахтааһын миэрэлэринэн тардыллыы тахсан, үлэ барыта сэтинньи ыйга түмүктэниэҕэ», — диэн Амма нэһилиэгин баһылыга Михаил Артемьев сырдатар.

«Көрөөччүлэрбит аныгылыы тупсаҕай көрүҥнээх, сылаас, сырдык саалаҕа кэлэн биһиги тэрээһиннэрбитигэр куруук сылдьыахтара, астына-дуоһуйа сынньаныахтара диэн күүтэбит. Амма дьаһалтатыгар уонна олохтоохторугар көмөлөспүттэрин иһин махтанабыт», — диэн норуот айымньытын дьиэтин методиһа Гаянэ Даниловна үллэстэр.

                          Алтана Артемьева, Амма олоҕо

Следите за самым важным и интересным в Telegram-канале и WhatsApp-группе ЯСИА