Быйыл Амма улууһугар Дьиэ кэргэн экономикатын сыла биллэриллибитэ. Улуус дьаһалтата онно анаммыт сыллааҕы тэрээһиннэр чэрчилэринэн М.Г. Сафронов аатынан ЯНИИСХ-ны кытта дуогабардаһан, Саха сирин айылҕатыгар анаан оҥоһуллубут моонньоҕону, черемуханы уонна яблоняны ылан, нэһилиэнньэҕэ тарҕатар үлэни тэрийдэ.
Улуус баһылыгын бастакы солбуйааччыта Иннокентий Климентов иһитиннэрбитинэн, уктары тиэйии-таһыы ороскуотун салалта бэйэтэ уйунар. “Суол арылынна да уктары аҕалыахпыт уонна нэһилиэктэргэ тириэрдиэхпит. Нэһилиэнньэ интэриэстээх, үүннэрэргэ баҕалаах”, — диэн иһитиннэрдэ кини.
Барыта тиэллэн тиийиэхтээх: 4 суорт 800 моонньоҕон уга, черемуха 35 ук, яблоня 40 ук, акация 5 ук.
Амма сирэ быйаҥнаах. Онон ыаллар бэйэлэрин тиэргэннэригэр битэмииннээх отоннору үүннэрэн, күннээҕи астарыгар туттуохтара, атыылаан дохуот да киллэриниэхтэрин сөп.
Тыа сиригэр дьон олоҕун хаачыстыбатын тупсарыыга салалта тэрээһинэ атыттарга холобур буолуон сөп.
