Ил Дархан Айсен Николаев дьыалабыай сырыытын кэмигэр, Докучаевскай куорат инфраструктуратын чөлүгэр түһэрии үлэтин хаамыытын билистэ, суруйда Саха сирэ саайт.
Айсен Николаев уонна ДНӨ баһылыга Денис Пушилин куорат эбийиэктэрин тупсарыыга Саха сирин исписэлиистэрин күүстэринэн хайдах үлэ баран иһэрин көрдүлэр.
Оробуочай биригээдэлэр эргэ мастары эрбээн, куорат пааркатын территориятын ыраастаабыттар. «Чугастааҕы былаанынан сатыы дьон сылдьар суолларын, паарка зонатын тупсарыы, ону тэҥэ сырдатыы үлэлэрэ барыахтара», — диэн Саха сирин биир кэлим координационнай киин салайааччыта, дойду Бэрэсидьиэнин иһинэн Саха сирин бэрэстэбиитэлистибэтин салайааччыта Андрей Федотов иһитиннэрдэ.
Кини куоракка элбэх кыбартыыралаах дьиэлэри өрөмүөннээһин саҕаламмытын, олохтоох култуура дьиэтин уонна да атын эбийиэктэри тутууну былааннаабыттарын иһитиннэрдэ.
«Саха сирэ рентгенкабинет өрөмүөнүнэн уонна саҥа оборудованиенан хааччыйыынан дьарыктанар. Өссө Докучаевскайга информационнай технологиялар кииннэрэ тэриллэрэ былааннанар, куоракка «Экстра Синема» хампаанньаттан киинэлэри көрдөрүү тиһигэ оҥоһуллуоҕа. Куорат уокуругун нэһилиэнньэлээх пууннарын уулуссаларын өрөмүөннээһинэ саҕаланна», — диэн Андрей Федотов иһитиннэрдэ.
Айсен Николаев Докучаевскай ДНӨ куораттааҕы уокурук нэһилиэнньэлээх пууннарын маастар-былааннарын оҥорууну түргэтэтэргэ сорудахтаата.
«Үлэ элбэх. Үчүгэй тэтим ылыныллыбыт, ол эрээри, элбэх кыбартыыралаах дьиэлэри өрөмүөннээһиҥҥэ, оскуолалары, оҕо уһуйааннарын, култуура дьиэлэрин, култуура уонна сынньалаҥ пааркатын тутууга бырайыактыыр-сметнэй докумуоннары оҥорууну өссө тэтимирдиэххэ наада», — диэн бэлиэтээн эттэ Ил Дархан.
Ону сэргэ Айсен Николаев ДНӨ баһылыга Денис Пушилины кытары «Юность» успуорт уораҕайын чөлүгэр түһэрии үлэтин хаамыытын билистэ. Билигин успуорт уораҕайыгар көтүрүү үлэлэр ыытыллаллар. Ону тэҥэ территориятын тупсарыы үлэлэрэ көрүллэр. Бассейны көтүрүү түмүктэннэ.
Айсен Николаев дойду Бырабыыталыстыбатыгар уонна Территорияны сайыннарыы пуондатын аадырыһыгар успуорт уораҕайын өрөмүөнүгэр урутаан үбүлээһини биэрэргэ сурук ыытыллыахтааҕын, эһиил балаҕан ыйын 1 күнүгэр эбийиэк өрөмүөннэнэн, үлэҕэ киириэхтээҕин бэлиэтээтэ.
«Мин бэйэм өттүбүттэн көмөлөһөргө бэлэммин. Хамаандабыт улахан. Үлэ болдьоҕунан хаачыстыбалаахтык толоруллуоҕа диэн эрэнэбин», — диэтэ Айсен Николаев.
СӨ Ил Дарханын уонна Бырабыыталыстыбатын пресс-сулууспата
