Ил Түмэн ююджет, үп, нолуок уонна сыана бэлиитикэтигэр сис кэмитиэтин бэрэссэдээтэлэ Юрий Николаев ЯСИА-ҕа Саха Өрөспүүбүлүкэтин баһылыга Айсен Николаев Судаарыстыбаннай Мунньахха (Ил Түмэҥҥэ) оҥорбут отчуотун туһунан санаатын үллэһиннэ.
«2025 сыл, арааһа, биир саамай уустук сыллартан биирдэрэ. Маннык усулуобуйаҕа өрөспүүбүлүкэ бырабыыталыстыбатын иннигэр турбут соруктар уопсайынан толорулуннулар. Бырабыыталыстыбаҕа сүрүн баҕа санаам — түмүктэри үчүгэйдик ырытан, сыыһалары хатылаабат туһугар», — диэн Юрий Николаев эттэ.
Бэрэссэдээтэл ааспыт сыллааҕы бүддьүөт тула дьокутааттарга элбэх ыйытыы үөскээбитин туһунан иһитиннэрдэ.
«Биһиги 2025 сыллааҕы бүддьүөтү көрбүппүт, ол бастакы ылыныллыбыт көрүҥтэн атын этэ. Сыл устата дьокутааттар уларыйыыттан тэйиччи тутуллубут курдук этилэр. Биһиги көрсүһүүбүтүгэр быйыл хайаан даҕаны көннөрүү наадатын туһунан сөбүлэстибит», — диэтэ Юрий Николаев, көһөрүүлэр бырабыыталыстыба саппаас пуондатыгар баалларын бэлиэтээн туран.
Эрдэ иһитиннэрбиппит курдук, Саха Өрөспүүбүлүкэтин Ил Дархана Айсен Николаев сыл аайы Судаарыстыбаннай Мунньах (Ил Түмэн) иннигэр отчуоттуур. Дакылаатыгар Айсен Николаев 2025 сылга толорор былаас уорганнарын үлэтин түмүктэрин таһаарда. Норуот дьокутааттара отчуоту өйөөтүлэр.
