Алтынньы 2 күнүгэр Аллараа Новгород куоракка 100 км уһуннаах дистанцияҕа сүүрүүгэ Арассыыйа чемпионата буолла. Саха сирин сүүмэрдэммит хамаандатын спортсменнара икки мэтээли ыллылар, диэн СИА кэпсиир.
Дьахталларга чемпион аатын Надежда Бут ылла. Кини дистанцияны 7 чаас 25 мүнүүтэ уонна 11 сөкүүндэнэн сүүрэн кэллэ. Өссө биир мэтээли 100 км 7 чаас 41 мүнүүтэ уонна 34 сөкүүндэ түмүктээх өрөспүүбүлүкэ сүүмэрдэммит хамаандатын састаабыгар баар Изабелла Борисова аҕалла.
Эр дьоҥҥо төрдүс миэстэни 6 чаас уонна 52 мүнүүтэ көрдөрүүлээх Александр Моедо ылла. Василий Лукин финалга бэһис, оттон Альберт Варламов тохсус кэлбит.
Саха сирин хамаандата уопсай зачекка кыһыл көмүс мэтээл хаһаайынынан буолла.
Спортсменнар тренердэрэ — Арассыыйа үтүөлээх маастара Татьяна Жиркова.
