24 Ыам ыйа 24.05
  • -7°
  • $ 104,68
  • 115,6

"Земскэй доктор" уонна "Земскэй фельдшер" бырагырааманан авиабилиэттэргэ чэпчэтии көрүллүөҕэ

Саха сиринээҕи тырааныспар министиэристибэтэ «Земскэй доктор» уонна «Земскэй фельдшер» федеральнайдааҕы бырагыраамаҕа кыттыбыт 13 Арктика улуустарын мэдэссиинэтин үлэһиттэригэр Дьокуускайга диэри уонна төттөрү хайысхаҕа сөмөлүөт билиэттэрин субсидиялыаҕа. СИА “Земскэй доктор” бырагырааманан үлэлии сылдьар быраастар саныылларын иһиттэ.

Дмитрий Корякин Абый улууһун Ураһалаах нэһилиэгин участковай бырааһа “земскэй доктор” бырагырааманан иккис сылын үлэлиир. Бэйэтэ үөрэҕин бүтэрэн баран төрөөбүт улууһугар төннүбүт. “Бырагыраама тахсыбытын истибитим, уоппускабар туһанар инибин. Үлэлии кэлиэхпиттэн бырайыаһы толору төлөөн сырыттым”, — диэн санаатын эттэ.

Эдэр үлэһиттэри өйүүр бырагыраамалар бааллара олус үчүгэй. Мин манна кэлбитим номнуо бэһис сылыгар барда. Бырайыас сыаната Дьокуускайга диэри 30 тыһ солк курдук буолар, кэлэ бара син баһаам харчы хамсыыр. Командировкаҕа бырайыас көрүллэр эрээри, киһи куоракка бэйэтин тус дьыалатынан эбэтэр ыксаллаах дьаһаллар көстөн, булгуччу киириэн наада түгэнэ баар буолар. Онно куруук харчы баар буолбат. Онон бу курдук өйөбүллэри биһиги өрүү күүтэбит. Быйыл чэпчэтиинэн хайаан даҕаны туһанар былааннаахпын”, — диэн Чокурдаах бөһүөлэгин лор-бырааһа Анастасия Шульгина бэлиэтээтэ.

Субсидиялаах авиабилиэти атыылаһарга Арктика улууһугар олороргун мэктиэлиир суруктаах уонна мэдэссиинэ тэрилтэтигэр федеральнайдааҕы бырагрырааманан үлэлиириҥ туһунан ыспыраапкалаах буолуохтааххын.

Бу дьаһалы Арктика улуустарыгар үлэлиэн баҕалаах уонна үлэлии сылдьар медиктар табыгас сыаналаах билиэтинэн туһаналларын туһугар олоххо киллэрдилэр.

Арктика улуустарыгар доруобуйа харыстабылыгар 120 киһи үлэлии-хамсыы сылдьар.

Быйылгы сылтан Арктика нэһилиэнньэлээх пууннарыттан Дьокуускай аэропордугар уонна төттөрү хайысхаҕа чэпчэтиилээх билиэтинэн айанныахха сөп (Белая гора, Чокурдаах, Тиксии, Сааскылаах, Зырянка, Баатаҕай, Эдьигээн, Муома, Черскэй, Орто Халыма, Депутатскай, Саккырыыр). Арктика улуустарыгар  регистрациялаах, чахчы онно олорор дьоҥҥо бу бырагыраама төгүрүк сыл үлэлиэҕэ.

Следите за самым важным и интересным в Telegram-канале и WhatsApp-группе ЯСИА
1
0