Саха Өрөспүүбүлүкэтин Ил Дархана Айсен Николаев МАХ-ханаалыгар Арассыыйа Бырабыыталыстыбатын бэрэссэдээтэлин солбуйааччы — Арассыыйа Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев Дьокуускайга сырыытын туһунан таһаарыылара бары информационнай ситимнэргэ киэҥник сырдатыллар, суруйда Саха парламент саайт.
Ол курдук, от ыйын 29 күнүгэр Юрий Трутнев Уһук Илин уонна Аартыка сайдыытыгар РФ Бырабыыталыстыбатын хамыыһыйатын президиумун мунньаҕын салайан ыытта. РФ Бырабыыталыстыбатын Уһук Илин уонна Аартыка сайдыытыгар миниистирэ Алексей Олегович Чекунков билигин үлэлии турар бырагыраамалары сэргэ Саха сирин бырайыактарын билиһиннэрбитин бэлиэтиэххэ сөп.
Ити күн үрдүкү дуоһунастаах федеральнай чунуобунньук Өлүөнэ муостатын тутуу былаһааккатыгар сылдьан бэрт эрэннэриилээх этиилэри оҥорбутун бэлиэҕэ ылыахха сөп. Кини Өлүөнэ муостата — бу Саха сиригэр эрэ буолбакка, бүтүн Уһук Илин стратегическай тутуута буоларын уонна тырааныспар сибээһин хааччыйыыга, экэниэмикэ сайдыытыгар, инвестиция бырайыактарын логистикатын олоххо киллэриигэ уонна дьон олоҕун таһымын үрдэтиигэ саҥа кыахтары биэрэрин чорботон бэлиэтээтэ. «Өлүөнэ муостатын тутуу туһунан кэпсэтии хас да сыл барда. Бу лаппа уустук эбийиэк. Маныаха Саха Өрөспүүбүлүкэтин Ил Дархана Айсен Сергеевич туруорсуута, хамсатыылаах дьайыылара улахан оруолу ылар. Тутууну үбүлээһиҥҥэ Саха Сирэ обургу чааһын уйунар, ону тэҥэ федеральнай бүддьүөт эмиэ кыттар. Муоста тутуутун үлэлэрэ номнуо саҕаламмыттара суолталаах. Тутуу түһүмэхтэринэн туох үлэ ыытыллыахтааҕар өйдөбүл баар уонна кэлэр саас көмүөл саҕаланыар диэри ыытыллыахтаах үлэ былаана чопчу оҥоһуллан, биллэр. Ол муостаны салгыы тутарга кыах биэрэр», — диэн федеральнай боломуочунай бэрт инникилээх бэлиэтээһини оҥордо.
Үрдүкү салалта бэрэбиэркэтин кэмигэр тутааччылар тутуу сүрүн түһүмэҕэр киирбитин, бэс ыйыгар-от ыйыгар Өлүөнэ сүрүн үөһүгэр икки коффердамы таһааран, этэҥҥэ олохторун булларбыттарын, үһүс коффердамы холбоон таҥыы салҕанарын туһунан отчуоттаатылар.
Билигин Өлүөнэ уҥа-хаҥас кытылыгар тутааччылар олороллоругар анаан көһө сылдьар бөһүөлэктэр уонна оҥорон таһаарар сыахтардаах түөрт технологическай былаһаакка тэриллибит. Хаҥас кытыллааҕы эстакада бастакы тирэҕэ тутулунна, бырайыагынан көрүллүбүт 920 сыбаайаттан 244 турда. Тамма өрүс сүнньэ уларытылынна. Үйэ тутуутугар кыһыҥҥы усулуобуйаҕа анаммыт үс бетон собуота оҥоһуллан, үлэлии тураллар.
2026 сыл бүтүөр диэри уҥа кытылга биир тирэҕи уонна хаҥас кытылга икки тирэҕи тутуу, уҥа кытыл эстакадатын 13 тирэҕэр уонна өрүс сүнньүгэр үүттэнэр сыбаайалары туруоруу былааннанар ( бетону уста сылдьар баржалартан коффердам иһигэр туруоруллубут буурунан кутуохтара).
«Сулуска» сырыы
От ыйын 30 күнүгэр Юрий Трутнев Ил Дархан Айсен Николаевы кытта «Сулус» үөрэтэр — ытар кииҥҥэ уонна Дьокуускайдааҕы кадеттар оскуола-интэринээттэригэр сырыттылар, үөрэтэр-такайар инструктордар үлэлэрин кытта билистилэр. Федеральнай боломуочунай эдэр ыччаты үөрэтиигэ байыаннай дьайыыга кыттыбыт уопуттаах дьон кытталларын, настаабынньыктыылларын ордук суолталаах диэн бэлиэтээтэ. «Сулус» киин билигин дойду үрдүнэн ыраах дистанцияҕа, 3,8 килэмиэтиргэ диэри ытыыга биир улахан полигонунан биллэр.
Айсен Сергеевич МАХ-ханаалыгар суруйбутунан, Аҕа дойду Улуу сэриитигэр аатырбыт снайпер, Сэбиэскэй Сойуус Дьоруойа Федор Матвеевич Охлопков кэриэһигэр ыраах дистанцияҕа ытыыга ыытыллар турнирга бэлэмнэнии үлэтин дьүүллэһии буолбут. Быйыл турнир норуоттар икки ардыларынааҕы таһымынан ыытыллыаҕа, атын дойдулартан бастакы сайаапкалар киирэн эрэллэрин иһитиннэрбиттэр. Юрий Петрович этии киллэрбитинэн, 16-18 саастаахтарга Уһук Илин хамаандаларын икки ардыларыгар күрэҕи турнир таһынан ыытыахпыт диэбиттэр. Ытыы кыра халыыбырдаах бинтиэпкэлэринэн оҥоһуллуоҕа.
