Өлүөнэ өрүскэ муус кытыыта Иркутскай уобалас Жигалово сэлиэнньэтин анныгар турар. Орто сүүрүккэ уу таһыма үрдээн иһэр, муус хараарар. Ол туһунан ыам ыйын 4 күнүгэр Саха сиринээҕи УГМС иһитиннэрдэ.
Өлүөхүмэ оройуонун Солянка сэлиэнньэтиттэн Дьокуускай куорат таһынааҕы Табаҕа сэлиэнньэтигэр диэри учаастакка сууккаҕа уу 18-37 см үрдээтэ.
Санатан эттэххэ, сабаҕалааһынынан, муус барыыта Саха сирин кыраныыссатыгар быһа холоон ыам ыйын 8 күнүгэр, Ленскэйгэ — ыам ыйын 12 күнүгэр, оттон өрөспүүбүлүкэ киин куоратыгар — ыам ыйын 17 күнүгэр тиийиэҕэ, ити былырыыҥҥытааҕар үс хонук хойутуоҕа.
Алдан, Амма уонна Бүлүү өрүстэр арыллыылара ыам ыйын бастакы дэкээдэтин бүтүүтүттэн иккис дэкээдэтигэр диэри күүтүллэр. Регион хоту уонна хотугулуу-илин өттүгэр муус барыыта ыам ыйын үһүс дэкээдэтигэр — бэс ыйын саҥатыгар, оттон Зырянка туһаайыытынан Халымаҕа ыам ыйын иккис дэкээдэтин бүтүүтүгэр саҕаланыаҕа.
Саха сирин өрүстэригэр муус устуутун сигэнэн онлайн кэтээн көрүөххэ сөп.
