«Канаат күөлтэн 10 м үөһэ ыйанна, уһуна 100 м. Идеяны толкуйдаабытым ыраатта, ити эрээри быйыл эрэ олоххо киллэрдибит. «МАМОНТенок» VII норуоттар ардыларынааҕы цииркэ бэстибээлигэр, цииркэбит 30 сылыгар, «Азия оҕолорун» оонньууларыгар анаатыбыт», — диэтэ кини.
Фото: Иван Евсеев
Хаартыска: Иван Евсеев
Тэрийээччилэргэ бастаан күүстээх тыал түспүтэ сэрэҕи үөскэттэ. Салгыы тэрээһин чугаһаабытыгар тыал тохтоон, ураты көстүү мустубут дьоҥҥо бэлэх буолла. Владимир Степанов бэйэтэ эппитинэн, олус долгуйбут, ити эрээри сыал ситиһиллибит.
«Бу бырайыакка кыттарбар этии 2-3 нэдиэлэ анараа өттүгэр киирбитэ. Сөбүлэспитим. Ону олоххо киллэрдибит. Кылаабынайа, дьон өйөбүлүн биллим. Махталым улахан. Уонна, биллэн турар, саамай күүстээх өйөбүл кэргэним уонна оҕолорум буоллулар», — диэтэ экстремальнай трюк кэнниттэн канаатынан хаамааччы.
Куттал суоһаабатын наадатыгар Саха сиринээҕи быыһыыр сулууспа сотрудниктара дьуһуурустуба олохтоотулар. Ити эрээри кинилэр көмөлөрө туһаныллыбата.
