22 Тохсунньу 22.01
  • -48°
  • $ 73,82
  • 83,32

Василий Егоров: Дойдубар, өрөспүүбүлүкэбэр иккис кыһыл көмүс мэтээли аҕалбыппыттан дьоллоохпун

16:48, 26 июня 2017
Текст:

Боксаҕа Россия икки төгүллээх чемпиона Василий Егоров Европа чемпионатыгар өрөгөйдөөхтүк киирсэн, Сахатын сиригэр иккис кыһыл көмүс мэтээлин аҕалла. Кини күрэхтэһии кэнниттэн суруналыыстарга санаатын үллэһиннэ, былаанын кэпсээтэ, биир дойдулаахтарыгар махтанарын биллэрдэ.


— Европа чемпионата хайдах ааста?

— Турнир иннинэ мин элбэх күрэхтэһиилэргэ уонна сбордарга сылдьыбытым: Болгарияҕа, Финляндияҕа, Ирландияҕа, Кисловодскайга уонна Сочига. Ол кэннэ Европа чемпионатыгар Харьковка барбытым. Бастакы киирсиигэ турнир хаһаайынын кытта киирсэн, 5:0 ахсаанынын баһыйбытым. Финал аҥарыгар белоруһы кытта тургутуһан, бэйэм туспар эмиэ итиччэ ахсааны хомуйбутум. Финалга миэхэ утары англичанин Галай Яфай тахсыбыта. Күүстээх утарылаһааччы. Хара ааныттан дохсуннук саҕалаабыта. Мин иккис нүөмэринэн үлэлээбитим. Рингэҕэ сылбырхайдык туттунарым, ити мин кыаҕым этэ. Түмүгэр 3:2 ахсааҥҥа кыайбытым.

— Күрэхтэһии эн санааҕар тэрээһин өттүнэн хайдах ааста?

— Олус үрдүк таһымнаахтык. Бастаан Украинаҕа арыый тыҥааһыннаах соҕус буолара буолуо дии санаабыппыт. Ити эрээри хайдах поезтан түһээппитин кытта, охрана сыһыарбыттара. Рингаҕа тахсарбытыгар кытта полиция көрүүтүгэр сырытыннарбыттара. Туох да провокация суоҕа. Олохтоох дьон олус эйэҕэстэрэ. Биһигини кытта хаартыскаҕа түспүттэрэ. Боксаны олус сөбүлүүллэр.

— Эйигин украинеһы кытта киирсиитэ, кинини өйүүр киһитэ элбэҕинэн, кытаанах соҕус буолара буолуо диэн сабаҕалааһыннар бааллара. Хайдах этэй туругуҥ?

— Хайаан да кыайыахтаахпын диэн толкуйдааҕым. Олохтоох боксердары көрөөччүлэр өйүүллэрин билэбин, ол иһин мөлтөөн биэрэр кыаҕым суоҕа. Мин утарылаһааччыбын баһылыыр күүспүн булан, ыраас кыайыыны ситиспитим.

— Европа чемпионатын иккистээн ылыы хайдаҕый эн санааҕар?

— 2015 сыллааҕы кыайыым олус үөрүүлээх түгэн этэ. Билигин арыый да ыарахан — утарылаһааччыларым миигин билэллэр, онон күүскэ бэлэмнэммиттэр. Олус дьоллоохпун, дойдубар уонна өрөспүүбүлүкэбэр иккис кыһыл көмүс мэтээли аҕалбыппар.

— Аан дойду чемпионатыгар кыттыыгар бэлэмнэниигин хаһан саҕалыаххыный?

— Күрэхтэһии түмүгүнэн аан дойду чемпионатыгар 49 киилэҕэ дылы ыйааһыҥҥа путевка туттум. Атырдьах ыйын бүтүүтэ Германияҕа буолуоҕа. Билигин дойдубар кыратык сынньана түһэн баран, Кисловодскайга уонна Сочига бэлэмнэниим саҕаланыахтаах.

— Туймаада ыһыаҕын кэмигэр эн кыайыыҥ туһунан үрдүк трибунаттан дуораччы эппиттэрэ. Тыһыынчанан дьон үөрүүлэриттэн уруй-айхал өрөгөйүн түһэрбиттэрэ.

— Бырааһынньыгы, ыһыах салгынын күүппүтүм. Миэхэ улахан эппиэтинэс сүктэриллибитэ. Олус дьоллоохпун биир дойдулаахтарбар үөрүүнү аҕалбыппынан.

— Кимиэхэ махтаныаҥ этэй?

— Тренербэр Артур Пахомовка, бокса Федерациятын президенигэр Петр Алексеевка, төрөппүттэрбэр, бииргэ төрөөбүттэрбэр. Күрэхтэһии кэмигэр миигин спортивнай маастарыстыба үрдүкү оскуолатын дириэктэрэ Александр Игнатьев өйөөбүтэ. Киниэхэ махтанабын. Уонна, биллэн турар, биир дойдулаахтарбар миэхэ куруук эрэнэллэригэр уонна тулхадыйбат өйөбүллэригэр.

0
0
22 января 22.01
  • -48°
  • $ 73,82
  • 83,32