Дьааҥыга ыытыллыбыт Олоҥхо ыһыаҕар төһө да айана ырааҕын, ороскуоттааҕын үрдүнэн, өрөспүүбүлүкэ бары улуустара кыттыыны ыллылар.
Алексей Федотов баһылыктаах Уус Алдан улууһун дэлэгээссийэтэ 35 киһилээх кэлэн, Олоҥхо ыһыаҕар бары бириистээх миэстэлэргэ тигистилэр. Ол курдук, Мүрү нэһилиэгиттэн Саина Обутова «Дуорайа туруохтун туундарам дорҕооно» диэн эбээннии ырыаҕа бастаан, Гран-при бирииһинэн — өҥнөөх телевизорынан -наҕараадаланна. Саха кыыһа эбээннии ыраастык ыллаан, Дьааҥы олохтоохторун эрэ буолбакка, ыалдьыттары кытта соһутта.
Лөгөй орто оскуолатын 5-с кылааһын үөрэнээччитэ Диана Петухова соҕотоҕун биэс күрэххэ кытынна уонна оҕолорго оһуокай күөн күрэһигэр эмиэ Гран при номинацияҕа тиксэн, 10 тыһ.солк. бэлиэтэннэ.
Бу курдук, уус алданнар хас бирдии ситиһиилэрин ааҕа туруохха сөп. Ол эрэ буолуо дуо, уус-алданнар түгэн булан, аатырбыт Киһилээххэ тиийэн, арчыланан кэллилэр.
Кэрэхсэбиллээҕэ баар, уус-алданнар алта олоҥхоһуттарыттан ураты, отучча киһиэхэ 40 тыһ. солк. суумалаах айан билиэтин уйуммуттар. Ыраах айан ороскуотун улуус дьаһалтата эрдэттэн бэйэтин бюджетигэр көрбүт.
