27 Тохсунньу 27.01
  • -48°
  • $ 73,82
  • 83,32

Уус Алдаҥҥа суоппардар күрэстэстилэр

09:20, 01 ноября 2016
Текст:

Алтынньы 29 күнүгэр Уус Алдан улууһун Тумул бөһүөлэгэр үгэскэ кубулуйбут сыллата ыытыллар «Суоппар күнэ» бэрт тэрээһиннээхтик ааста.


Быйылгы күрэххэ улуус 3 нэһилиэгиттэн ыраах айаҥҥа сылдьар тэрилтэ суоппардара күөн көрүстүлэр. Улуус киинин Мүрү нэһилиэгиттэн, ыаллыы сытар Суотту уонна Тумул сэлиэнньэлэриттэн барыта 25 кыттааччы муһунна.

Балаһыанньа быһыытынан сүрүн хамаанда 8 киһиттэн турар, суоппардар 7 көрүҥҥэ күрэхтэстилэр: волейбол, канат тардыһыыта, сыал ытыыта, дуобат, тимири уһаарыы уонна эстафета.

Эстафетаҕа хамаанда дьоно бастакы биэтэккэ бары массыыналарын анньан бэлиэтэммит миэстэҕэ аҕалаллар. Ол кэннэ биир киһи массыынаны домкраттаан көтөхтөрөр, салгыы иккис киһи көлүөһэни сүөрэр. Хамаанда үһүс чилиэнэ өһүллүбүт көлүөһэни сүгэн, биэтэги эргийэн кэлэр. Онтон көлүөһэни төттөрү иилэн, суоппар киһи массыынатын собуоттаан, араас мэһэйдэри туораан, гаражка кэннинэн киллэрэр. Салгыы хамаанда чилиэнэ гаражтан таһааран, эргийэн кэлэн, эстафета саҕаламмыт миэстэтигэр тиийэн тохтуур. Бу барыта бириэмэҕэ.

Күн бастакы аҥаарыгар Саха сиринээҕи ыраах айан суоппардарын ассоциацияларын салайааччыта Евдокия Дьячковская салалтатынан төгүрүк остуол тула салгыы былааннары кэпсэтиһии буолла. Евдокия Кимовна иһитинэрбитинэн, өрөспүүбүлүкэҕэ уопсайа ыраах айан суоппардарын ассоциациятыгар 10 улуус бэрэстэбиитэллэрэ киирсэр эбиттэр. Уус Алдан улууһун суоппардара бу ассоциацияга киирэллэрин бигэргэтэн, бары куоластаан, Гаврил Алексеевы улуус бэрэстэбиитэлинэн таллылар.

Күөн күрэс түмүгүнэн 1 миэстэни Мүрү нэһилиэгин суоппардара ыллылар, иккискэ тумуллар таҕыстылар, суоттулар үһүс бочуоттаах миэстэҕэ тигистилэр.

Киэһээ «Түмсүү» сынньалаҥ киинигэр кыайыылаахтары наҕараадалааһын уонна күрэх кыттааччыларын күүстэринэн туруоруллубут концерт буоллулар.

0
0
27 января 27.01
  • -48°
  • $ 73,82
  • 83,32