Оскуола оройуоҥҥа биир бастакынан туох баар усулуобуйаны тэрийэн, докумуонунан бигэргэтэн, уолаттары тракторист куурсугар үөрэтэр. Бу ааспыт сылтан улууска, эмиэ биир бастакынан, саха ынаҕын аҕалан иитэн саҕалаата. Оттон бу сайын өссө биир саҥа бырайыагы олоххо киллэрбиттэрин туһунан дириэктэр Изольда Стручкова кэпсээтэ:
— Биһиги бу үөрэх сылыгар буолаҕа уонна саадка үлэлииргэ икки бырайыагы саҕалаатыбыт. Былырыын күһүҥҥүттэн бэлэмнэнии үлэтин эрдэттэн ыытаммыт, бу сайын 26 араас көрүҥнээх үүнээйини олортубут. Ол иһигэр саадка биэс араас сорт яблоняны, икки көрүҥ малинаны, үс көрүҥ жимолость уонна моонньоҕон үс араас сордун. Бу үлэбитин Елена Иннокентьевна Семенова диэн бочуоттаах сынньалаҥҥа тахсан баран, агроном идэтин баһылаабыт, бэйэтэ саадка сөбүлээн дьарыктанар киһини кытта сүбэлэһэн ыыттыбыт.
Оттон буолаҕа Дьокуускайдааҕы тыа хаһаайыстыбатын научнай-чинчийэр институт салалтатынан от сэттэ араас көрүҥүн ыстыбыт. Идэлээхтэр сүбэлэринэн оту бастакы сылбытыгар теплицаҕа үүннэрдибит. Быйылгы сыл холонон уонна кэтээн көрүү буолар. Маны таһынан хортуоппуй 10 араас сордун олортубут. Урут хортуоппуйу түбэһиэх сортары олордор эбит буоллахпытына, быйылгыттан ханнык чопчу сорт биһиги усулуобуйабытыгар элбэх үүнүүнү биэрэрин быһаарыахпыт диэн баҕалаахпыт. Бу ыытар үлэбит барыта бэйэбитигэр баар кыһалҕалартан тахсар. Холобур, оту үүннэрбит биричиинэбит диэн — биһиэхэ киэҥ-куоҥ оттуур ходуһа суох. Оттон кэнэҕэс оту бэйэбит үүннэрэр буоллахпытына, син төһө эмэ эбиискэ буолуо этэ дии саныыбыт.
Ыытыллар үлэлэргэ барытыгар оҕолорбутун кытыннарабыт, ол курдук ыһыы үлэтигэр сайыҥҥы лааҕырбыт оҕолоро уонна быйылгы выпускниктарбыт төһүү күүс буоллулар. Оҕолор көхтөөхтөр, тэҥҥэ үлэҕэ ылсан иһэллэр, түргэнник үөрэнэллэр.
Бу бырайыактары баай уопуттаах учуутал Людмила Семёновна Стручкова салайар. Кини элбэх оҕону чинчийэр үлэҕэ кынаттаабыта, улууска, өрөспүүбүлүкэҕэ үгүс ситиһиилэрдээхтэр. Инникитин оҕолорбут интириэһинэй чинчийэр үлэлэри оҥоруохтара диэн эрэнэбит.
Үлэнэн төрөөбүт дойдуга туһаны аҕаларга иитэр, үлэҕэ интэриэһи тардар, саҥа сонун бырайыактары олоххо киллэрэр Ураһалаах агро-оскуолата өлгөм үүнүүнү ыларыгар, үтүө түмүктэри ситиһэригэр баҕарабыт.
Ааптар: Лариса Слепцова.
