21 Тохсунньу 21.01
  • -48°
  • $ 73,82
  • 83,32

Улахан Күөл саҥа оскуолатыгар гимн ньиргийдэ (ВИДЕО)

19:07, 18 января 2017
Текст:

  Бу күннэргэ Чурапчы улууһун Сылаҥ нэһилиэгин Улахан Күөл учаастагар өтөрүнэн буолбатах үөрүүлээх түгэн тосхойдо. Бу туһунан сиһилии edersaas.ru билсиҥ.


Ол курдук, нэһилиэнньэ туруорсуутунан, бу улуус биир саамай ыраах, түгэх сытар учаастагар 70 миэстэлээх (50 үөрэнээччи, 20 оҕо саадын иитиллээччитэ) таас оскуола-саад тутуллан, үлэҕэ киирдэ.

Үөрэх кыһата Аҕа дойду Улуу сэриитин бэтэрээнэ, ССРС үрдүкү оскуолатын туйгуна, РСФСР үөрэҕириитин туйгуна, биологическай наука кандидата Афанасий Акимович Макаров аатын сүгэр.

Үөрүүлээх тэрээһиҥҥэ СӨ Ил Дархана Егор Борисов,  СӨ үөрэҕин миниистирин бастакы солбуйааччы Феодосия Габышева, улуус баһылыга Андрей Ноговицын, Улуус Мунньаҕын бэрэссэдээтэлэ Яков Оконешников, “Сахатранснефтегаз” ААУо генеральнай дириэктэрэ, Ил Түмэн депутата Иван Макаров, “Россия ийэлэрэ” хамсааһын Саха сиринээҕи салаатын бэрэссэдээтэлэ, Егор Афанасьевич кэргэнэ Прасковья Петровна Борисова, о.д.а. кыттыыны ыллылар.

Улахан Күөл олохтоохторо урут уруккуттан тыа хаһаайыстыбатынан, сылгы-сүөһү иитиитинэн утумнаахтык дьарыктаналлар. Кэнники сылларга эдэр ыаллар хото олохсуйар, хааччыллыылаах дьиэ-уот туттар буолбуттар. Биир саамай кэрэхсэбиллээҕэ – бөһүөлэк хас биирдии ыалыгар ититэр ситим тардыллыбыт, онон, дьиэлэрэ олус сылаас эбит.

Үлэһит дьоннордоох бөһүөлэк. Сүөһүтүн ахсаанынан уонна үүтү ыаһыҥҥа биир киһиэхэ тиксэринэн бөһүөлэк улууска билигин I миэстэҕэ тахсыбыт. Биэ ыыллар эбит. Егор Афанасьевич оҕо эрдэҕинэ ийэтинээн Улахан Күөлгэ үгүстүк сылдьыбытын, дьиҥнээх биэ кымыһын, дьэ, манна амсайбытын нэһилиэк кырдьаҕастара санатаннар, ыалдьыттары үөртүлэр.

Оскуола “Үтүө дьыаланан” тутуллубут. Нэһилиэнньэ көрдөһүүтүнэн, манна, өссө эрдэ,  элбэх оҕолоох уонна кыаммат араҥаҕа киирэр ыаллар оҕолоругар анаан интэринээт аһыллыбыта. Онон, Улахан Күөл оскуолатыгар уолаттар-кыргыттар атын нэһилиэктэртэн, улуустартан тиийэ кэлэн үөрэнэллэр.

Саҥа оскуолаламмыт дьон, үөрүүлэрэ үксээн, олохтоох ааптар Федор Трофимов айбыт, олус үчүгэй тыллардаах, матыыптаах Улахан Күөл оскуолатын гимнин хорунан ыллаан ньиргиттилэр.

Санатан эттэххэ, “ Мин Сахам сирэ ХХI үйэҕэ” — “Үтүө дьыала”  хамсааһынынан Улахан Күөлтэн ураты өссө Кырыкыйга (Үөһээ Бүлүү), Өкүндүгэ (Бүлүү), Балаҕаннаахха (Уус Алдан) саҥа оскуола — саадтар тутуллан, 2016 сылга үлэҕэ киирдилэр.

0
0
21 января 21.01
  • -48°
  • $ 73,82
  • 83,32