РФ Үлэҕэ министиэристибэтэ Уһук Хотуттан уонна онно тэҥнэһэр сирдэртэн атын эрэгийиэннэргэ көһөр биэнсийэлээхтэргэ айаннарын ороскуотун толуйууну (компенсацияны) түргэтэтэр уонна чэпчэтэр. Бу туһунан бырабыытылыстыба уурааҕын барыла таҕыста. Саҥа быраабыла үлэни түргэтэтэрин таһынан, сайабылыанньа биэрээччилэргэ олус табыгастаах буолуоҕа, суруйда Саха сирэ саайт.
Сэттэ күн иһигэр төлөнүөҕэ
Хоту дойду олохтоохторо үлэлииллэрин кэмигэр да, биэнсийэҕэ да тахсан баран судаарыстыбаттан өйөбүл ылар бырааптаахтар. Үлэлээбэт биэнсийэлээхтэр атын эрэгийиэҥҥэ олоро көһөллөрүгэр айаннарын уонна багаастарын ороскуотун төнүннэрэр кыахтаахтар. Маны таһынан, кинилэри кытта кэргэннэрэ эбэтэр иитиилэр дьонноро (18 сааһыгар диэри оҕолоро, сиэннэрэ, биитэр 23 сааһыгар диэри күнүскү салааҕа үөрэнэр, ону тэҥэ кыра эрдэхтэриттэн инбэлиит оҕолор) көһөр буоллахтарына, кинилэр ороскуоттарын эмиэ төлүүллэр.
Сайабылыанньаны Социальнай пуонда салаатыгар тиийэн, «Госуслуги» нөҥүө эбэтэр буостанан биэриэххэ сөп.
«Биһиги толуйууну ылар бэрээдэги чэпчэтэбит уонна түргэтэтэбит. Билигин биэнсийэлээх сайабылыанньа суруйара уонна ороскуотун туоһулуур докумуоннары эрэ сыһыарара ирдэниэҕэ», — диэн РФ Үлэҕэ уонна социальнай көмүскэлгэ миниистирэ Антон Котяков быһаарда. Миниистир этэринэн, эбии ыспыраапка көрдөөбөттөр: Социальнай пуонда биэдэмистибэлэр икки ардыларынааҕы систиэмэ нөҥүө наадалаах дааннайдары бэйэтэ хомуйуоҕа.
Саамай сүрүнэ — төлөбүр болдьоҕо кылгыыр. Билиҥҥи сокуонунан сайабылыанньаны көрөргө 30 хонук уонна харчыны ыытарга эмиэ 30 хонук бэриллэр. Оттон саҥа быраабыланан ити болдьох 7 хонукка диэри кылгыаҕа.
