РФ бырабыыталыстыбатын бэрэссэдээтэлэ Михаил Мишустин Уһук Хоту олорор биэнсийэлээхтэр айанныылларыгар санаторийга, профилакторийга, аймахтарыгар барбыттарын туоһулуур ыспыраапка ирдэммэтин туһунан дьаһалга илии баттаата.
Судаарыстыбаннай Дуума дьокутаата Галина Данчикова бу боппуруоһу Саха сирин быыбардааччыларын көрдөһүүлэринэн РФ Үлэҕэ уонна социальнай сайдыыга министиэристибэтигэр, Биэнсийэ пуондатыгар элбэхтик туруорсубута.
«Олохтоохтор аймахтарыгар, оҕолоругар күүлэйдии, сынньана баралларыгар хантан ыспыраапка ылалларын өрүү ыйытааччылар, — диир Галина Данчикова. — Биир үксүн ол ыспыраапка төлөбүрдээх буолааччы. Билигин боппуруос быһаарылынна. Сымыйа докумуон аны ирдэммэт».
Уһук Хоту олорор үлэтэ суох биэнсийэлээхтэр, инбэлииттэр билигин бырайыаска толуону хос ыспыраапката суох көрдүөхтэрин сөп.
