Томпо улууһугар билигин Афганистан сэриитигэр кыттыбыт 9 киһи уонна Кавказ республикаларыгар сэриигэ кыттыбыт 46 киһи олорор.
Афганистан республикатыгар сулууспалаабыттар ортолоругар суоппар, гранатометчик, стрелок-зенитчик, авиамеханик, пулеметчик бааллар.
Олег Спильник Кировоградскай уобаластан армияҕа барбыта. Взвод командирын солбуйааччы буолбута. Старшина Олег Спильник «Сулус» орден 2-с степенинэн, «Хорсунун иһин», «Интернационалист-буойун», «Воинская доблесть» мэтээллэринэн наҕараадаламмыта. Билигин дьиэ кэргэнин кытта Теплай Ключ сэл. олорор, суоппардыыр.
Виктор Черемисин (Ыҥаа нэһ.) Томпо байыаннай комиссариатынан 1986 с. армияҕа ыҥырыллыбыта. Афганистан республикатыгар авиамеханигынан сулууспалаабыта. Оскуолкаҕа хаҥас илиитин тарбахтарын, тобуктарын уҥуоҕун быһа көтүттэрбитэ, онон 3-с группалаах инбэлиит буолбута. Ефрейтор Виктор Черемисин «Интернационалист – буойун», «Бойобуой дьайыылар кыттыылаахтара» мэтээллэринэн наҕараадаламмыта.
Рядовой Николай Мельник 1985 с. армияҕа Молдавияттан ыҥырыллыбыта. Механик – водителинэн сулууспалаабыта. Хаҥас буутугар бааһырбыта. «Хорсунун иһин», «Бойобуой үтүөлэрин иһин», «Интернационалист-буойун» мэтээллэринэн наҕараадаламмыта.
Хоту Кавказка уонна Чечняҕа сулууспалаабыттартан 38 киһи Томпо байыаннай комиссариатынан, Владислав Уваров Амматтан, Семен Егоров уонна Александр Жук Дьокуускайтан армияҕа ыҥырыллыбыттара. Младшай лейтенант Александр Богатырев (Хаандыга б.) механик-водителинэн сулууспалаабыта, «Хорсунун иһин» орденынан наҕараадаламмыта.
Алта киһи снайпер, 4 киһи разведчик этилэр. Радистар Тимофей Газизов, Валентин Трифанов, стрелоктар Андрей Дягилев, Сергей Кисляков, водитель Александр Моторин, электростанция начальнига Руслан Неровный отделение командирдара буолбуттара.
Старшай сержант Василий Диодоров билигин Томпо полициятыгар ГИБДД лейтенанынан сулууспалыыр. Кэргэннээх, үс уол оҕолоох. Кинини, Валерий Канаевы уонна да атын саха уолаттарын кытта Арыы Толоонтон сулууспалаабыт Михаил Сыромятников сэриигэ өлбүн дойдутугар аҕалан көмпүттэрэ.
Иван Захаров армияҕа 1991-1993 сылларга сулууспалаабыта, ол иһигэр Абхазия республикатыгар. «Байыаннай сулууспаҕа туйгунун иһин» мэтээлинэн наҕараадаламмыта. Билигин Ыҥаа нэһилиэгин баһылыгынан үлэлиир. Кэргэнэ Наталья учуутал, 4 оҕолоохтор.
Владимир Артемьев механик-водителенинэн сулууспалаабыта. Орденынан наҕараадаламмыта. Кэргэнэ Оксана оройуон хаһыатын редакциятын бухгалтера. Үс уоллаахтар.
Теплай Ключка «Магадан трассатын тутуу» уонна Мэҥэ Алдан орто оскуолатын түмэллэригэр «итии точкаларга» сулууспалаабыт буойуннарга анаан стендэлэр бааллар.
