Ааспыт өрөбүллэргэ Амма, Уус-Алдан, Таатта хаһаайыстыбаларыттан барыта 17 төбө саха ынаҕын Томпо улууһун Охотский-Перевоз диэн сиригэр тиэртилэр. Саха ынаҕын иитиинэн фермер Валентина Гермогенова «Агростартап» күрэскэ кыайан, дьарыктанар буолбут. Бу туһунан тыа хаһаайыстыбатын министиэристибэтэ суруйар.
Валентина Гермогенова «Агростартап» диэн тыа хаһаайыстыбатын министиэристибэтэ кыра уонна дьоҕус урбаанньыттары, саҥа саҕалааһыннары өйүүр национальнай бырайыак иһинэн ыытар күрэһигэр кыайан, 4 мөл солк ылбыт.
«Ааспыт өрөбүллэргэ Амма, Уус-Алдан, Таатта хаһаайыстыбаларыттан барыта 17 төбө саха ынаҕын баржанан этэҥҥэ аҕаллыбыт. Улуустааҕы тыа хаһаайыстыбатын управлениетын салайааччы Дмитрий Ефимов күүс-көмө буолла. Сүөһүлэр билигин биир ыйдаах карантиҥҥа тураллар», — диир Валентина.
Охотский-Перевоз айылҕатынан саха ынахтарыгар табыгастаах. Маны бу сааскы сырыытын кэмигэр «Саха ынаҕа» тэрилтэ салайааччыта Александр Артемьев бигэргэппит.
«Хаһаайыстыба тэриниэхпит иннинэ «Саха ынаҕа» тэрилтэ исписэлииһин Андрей Турантаевы итиэннэ РФ үтүөлээх зоотехнигын Амматтан Александра Цыпандинаны кытары сүбэлэспитим. Саха ынаҕын уратытын, аһын үөрэппиппит. Хотоммутун кэҥэтэн, бэлэмнээбиппит. Эбии 30 туонна оту атыыластыбыт», — диэн фермер үллэстэр.
Валентина Гермогенова хаһаайыстыбатын сайыннарарыгар былаана киэҥ. Кэргэнинээн иккиэн үлэлииллэр. Граннарын суотугар эбии икки үлэһити ылбыттар. Биисинэс-былаанын Валентина 4,5 мөлүйүөҥҥэ суруйбут, маныаха кини сүөһү итиэннэ тиэхиникэ атыытын киллэрбит.
«Амма Покровкатыттан биэс ыанньыгы, Уус-Алдантан икки оҕуһу, Таатта Баайаҕатыттан тоҕус туҥуй бургунаһы уонна биир ыанар ынаҕы ыллыбыт. Маныаха 2 мөл солкуобай харчы барда», — диир Валентина. Сотору саҥа МТЗ тыраахтыр ылан, саҥа хотон туттар баҕалааҕын, оттуур ходуһатын кэҥэтэн, сүөһүтүн ахсаанын элбэтэр санаалаах. Маны таһынан Валентина бухгалтер идэтигэр үөрэнэн, грант үбүн, төһөнү, ханна туттубуттарын, хаһаайыстыба хайдах сайдан иһэрин отчуоттуо.
2024 сылга диэри өрөспүүбүлүкэ үрдүнэн саха ынаҕын ахсаанын 660 төбөттөн 1 тыһ. диэри элбэтэр сорук турар.
