Саха Өрөспүүбүлүкэтин олох-дьаһах хомунаалынай хаһаайыстыбатын Томпотооҕу филиалын үлэһиттэрэ анал байыаннай дьайыыга ыҥырыллан уонна бэйэлэрин баҕа өттүлэринэн барбыттара. АБДь хонуутугар охтубут буойуннарга анаан, биир дойдулаахтара, кэллиэгэлэрэ Хаандыга бөһүөлэгэр кэриэстэбил аллеятын арыйдылар.
Томпотооҕу хомунаалынай хаһаайыстыба кэлэктиибэ бииргэ үлэлээбит дьоннорун аатын үйэтитэргэ хас биирдии буойун хаартыскалаах уонна үлэтин, сулууспатын туһунан кэпсиир өйдөбүнньүк суруктаах дуоскалары анал тирэхтэргэ туруорарга быһаарбыттара. Тэрилтэ үлэһиттэрэ ким төһө кыахтааҕынан уонна сатыырынан көмөлөспүттэрэ, аллеяны ситэрэн-хоторон биэрбиттэрэ.
Олох-дьаһах хомунаалынай хаһаайыстыба Хаандыгатааҕы учаастагар Жуков, «Байыаннай килбиэнин иһин» 2-с степенэ, «Бойобуой үтүөлэрин иһин» мэтээллэрдээх Артем Бушин ремонтник-силиэсэринэн, «Байыаннай килбиэнин иһин» мэтээллээх Константин Воронистай уонна Суворов, «Хорсунун иһин» мэтээллэрдээх младшай сержант Нюргун Румянцев силиэсэринэн, «Хорсунун иһин» мэтээллээх младшай сержант Владислав Тугашев уонна «Хорсунун иһин» 2-с степенэ, «Өлөн эрээччилэри быыһааччы» мэтээллэрдээх рядовой Константин Яковлев машинист-хачыгаарынан үлэлээбиттэрэ.
Ефрейтор Максим Стручков Кириэс Халдьаайы учаастагар, оттон Суворов мэтээллээх сержант Юрий Леонтьев Дьабарыкы Хайа учаастагар машинист-хачыгаарынан үлэлээбиттэрэ.
Кыайыы күнүгэр Аллея аһыллыытыгар тэрилтэ үлэһиттэрэ муһуннулар. Буойуннар аймахтара уонна чугас дьонноро, оройуон уонна Хаандыга бөһүөлэгин салайааччылара кэллилэр.
Томпо оройуонун ОДьКХ филиалын үлэһиттэрэ (дириэктэр Степан Яковлев, кылаабынай инженер Руслан Муталимцев, профсоюз салайааччыта Дмитрий Слепцов) бииргэ үлэлээбит дьоннорун сырдык ааттара умнуллубатыгар эттилэр.
Ааптар: Евдокия Неустроева
