1-кы Малдьаҕар нэһилиэгин Тойон Арыытыгар сааскы халааҥҥа бэлэмнэнии барар. Нэһилиэк баһылыгын солбуйааччыта Дмитрий Лаврентьев ууну этэҥҥэ аһардар туһугар эрдэттэн бэлэмнэнэр дьаһаллары сыллата тэрийэбит диэн иһитиннэрдэ.
Тойон Арыыга 41 олорор дьиэ баар, халаан кэмигэр 49 киһи, ол иһигэр 8 инбэлиит, 15 биэнсийэлээх сэлиэнньэҕэ хаалаллара былааннанар. Оттон 14 оҕону Булгунньахтаахха эвакуациялыахтара.
Сүөһүнү-сылгыны үрдүк сиргэ үүрүүгэ тойон-арыылар үөрүйэхтэр, ыксаллаах быһыы үөскээтэҕинэ хайдах-туох дьаһаналларын билэллэр.
«Күн бүгүн манна 52 төбө сылгы, 420 ынах сүөһү баар. Ыксаллаах быһыы-майгы таҕыстаҕына быстах кэмҥэ дьону олохтуур пуун Булгунньахтаахха «Дьиэрэй ырыа» култуура киинигэр тэриллиэҕэ. Бүддьүөт кырыымчыгын аахсыбакка дьаһалта сааскы халааҥҥа бэлэмнэнэн үбү-харчыны эрдэттэн көрөр, былаанныыр», — диэтэ Дмитрий Семенович, суруйда Ольга Гермогенова, «Хаҥалас» хаһыат.
