20 От ыйа 20.07
  • 18°
  • $ 88,02
  • 96,04

Тохсунньуга бүддьүөккэ 9,8 млрд киирдэ

11:32, 22 февраля 2018
Текст:
Читайте нас на
Яндекс Новости
ЯДВ

Ил Дархан Егор Борисов иллэрээ күн Миниистирдэр кэбиниэттэрин кытары мунньахтаата. Көрсүһүүгэ үп миниистирэ өрөспүүбүлүкэ бүддьүөтүгэр олунньу 1 күнүнээҕи туругунан, 9,8 млрд солк. хааһынаҕа киирбитин бэлиэтээтэ. Быйыл, уопсайа, 188 миллиарды «өлөрүөхтээхпит».


Валерий Жондоров иһитиннэрбитинэн, тохсунньуга кирэдьиити сабыыга 1 млрд солк. барбыт. Санатан эттэххэ, Валерий Алексеевич бу күннэргэ парламеҥҥа ыытыллыбыт мунньахха хамнаска иэс олунньу, кулун тутар ыйдарга барыта төлөнүллүөх­тээҕин иһитиннэрбитэ. Оттон бүддьүөт ороскуоттаах чааһа 10,3 млрд солк. тэҥнэспит.

Бастакы вице-премьер Алексей Колодезников, Андрюшкиноттан ураты, бары нэһилиэнньэлээх пууннарга кыһыҥҥы суол оҥоһуллубутун иһитиннэрдэ. Кини этэринэн, билигин Орто Халымаҕа суол аһыллан, 2 тыһ. тонна таас чох таһыллыбыт. Былаан быһыытынан, 644 тыһ. тонна чох тиэллиэхтээҕиттэн 324 тыһыынчата номнуо тиэллибит. Маны таһынан Алексей Засимович Уус Маайа улууһугар Югоренок бөһүөлэк хочуолунайыгар тахсыбыт баһаар туһунан иһитиннэрдэ. Бу хочуолунайга элбэх кыбартыыралаах 7 олорор дьиэ, дьаһалта дьиэтэ, почта, маҕаһыын холбонон олороллор.

Нэһилиэнньэ дьарыктаах буолуутун кэмитиэтин бэрэссэдээтэлэ Степан Москвитинбыйылгы сыллаах үлэ былаанын кэпсииригэр, өрөспүүбүлүкэ бары нэһилиэнньэлээх пууннарыгар үлэ ырыынагын чинчийэн көрүү түмүктэммитин иһитиннэрдэ. Кини бэлиэтииринэн, хас биирдии нэһилиэгинэн сыныйан үөрэтии ыытыллыбыт. Холобур, өрөспүүбүлүкэ үрдүнэн 25-һиттэн 54 сааһыгар диэри саастаах үлэлиир кыахтаах 19711 эр дьон баар эбит буоллаҕына, 8 тыһыынчаттан тахсата – үрдүк үөрэхтээх, 11500 – орто үөрэхтээх эбит. 4000 кэриҥэ киһи үөрэҕэ суох, 5880 эр киһи үлэҕэ наадыйар.

Маны таһынан кини “АЛРОСА” хампаанньа Үөһээ Муунатааҕы сиригэр дьону үлэлэтиигэ куонкурус ыыппытыгар 1200 киһи кыттыбытыттан 300 киһи үлэҕэ ылыллыбытын, 300 киһи анал үөрэххэ, 305 эдэр исписэлиис стажировкаҕа барыаҕын иһитиннэрдэ.
Бастакы вице-премьер-тыа хаһаайыстыбатын миниистирэ Петр Алексеев кыстык туһунан кэпсээн туран, сылгыларга уустук сыл ааһан иһэринэн 72 тыһыынчаттан тахса төбө эбии аһылыкка наадыйарын эттэ. Билигин улуустар сайаапка түһэрбиттэринэн көрдөххө, 1 тыһ. тонна кэриҥэ от наада. Бырабыыталыстыба Магадан, Амур ­уобаластарын кытары кэпсэтии ­ыытан, от аҕалтарарга үлэлэһэ сылдьар.
Мунньах түмүгэр Егор Борисов Москваҕа вице-премьер, РФ бэрэсидьиэнин Уһук Илин федеральнай уокурукка боломуочуйалааҕа Юрий Трутневы кытары кэпсэппитин, Уһук Илин уонна Байкал регионнарын сайдыытыгар туһуламмыт инвестиционнай бырайыактары олоххо киллэриигэ тэриллибит анал хамыыһыйа мунньаҕын түмүгүн иһитиннэрдэ. Кини манна “Русгидро” хампаанньаны кытары үлэлэһиини ордук чорботон эттэ. Итини таһынан Сочига буолбут Инвестиционнай форумҥа премьер-миниистир Евгений Чекин салалталаах Саха сирин дэлэгээсси­йэтэ ситиһиилээхтик кыттан кэлбитин бэлиэтээтэ.

Следите за самым важным и интересным в Telegram-канале и WhatsApp-группе ЯСИА