Тиксии бөһүөлэгэр сүүрүк табалары ытыалааһын түбэлтэтэ барыбытын аймаата. Бу күннэргэ Саха Өрөспүүбүлүкэтин Аҕыйах ахсааннаах норуоттарын бырааптарыгар боломуочунайа Константин Роббек кэлэн силиэстийэ хаамыытын кытта билистэ.
Боломуочуйалаах Булуҥ улууһугар буолбут түбэлтэнэн анаан-минээн үлэлии кэлбит. Ис дьыала миниистирэ Владимир Прокопенконы, улуус баһылыга Константин Шахурдины, «Булуҥнааҕы» МУТ салайааччыта Елена Баишеваны кытта кэпсэтиилэри ыытан, бу дьулаан быһыыга тус хонтуруолу туталларыгар көрдөспүт.
«Манна кэлээт, оройуоннааҕы аҕыйах ахсааннаах норуоттар бэрэстэбиитэллэрин кытта көрүстүм, санаалара түһэ сылдьар. Кинилэр баҕалара диэн ытыалаабыт дьону булан сокуон быһыытынан эппиэккэ тардыы. Маннык быһылаан мээнэ хаалбатыгар бары эрэллээхпит», — диир Константин Роббек.
Кини оройуон борокуруорун Максим Днепровскайы кытта эмиэ сирэй көрсөн кэпсэттэ. Чопчу чахчылар билиннэхтэринэ, тута киэҥ истиигэ таһаарары өрүттэр сүбэлэстилэр.
“Кэлэр нэдиэлэ саҕаланыытыгар Ис дьыала министиэристибэтиттэн икки исписэлиис кэлэрин күүтэбит, быһылаан буолбут сиригэр өссө эбии дакаастабылы көрдүөхпүт», — диэн полиция начальнига Павел Собянин иһитиннэрдэ. Дьыала Арктикатааҕы силиэстийэ отделыгар бэриллибит.
«Борокуратуура, полиция үлэһиттэрин кытта көрсөн ханнык быһаарыылар баалларын, уопсай санаабын өрөспүүбүлүкэ бырабыыталыстыбатыгар тиэрдиэм», — диэн түмүктээтэ боломуочуйалаах.
Санатар эбит буоллахха, муус устар 5 күнүттэн 6 сарсыардата буолар түүнүгэр Булуҥ улууһугар Табаһыт сүлүөтүгэр кытта кэлбит Күһүүр сүүрүк табаларын кырыктаахтык сэймэктээбиттэрэ. Бүгүҥҥү туругунан, 19 таба өлөрүллүбүтэ, 6 таба бааһырбыта биллэр. Быһылаан буолбут сиригэр булуллубут гильзалар билигин экспертизаҕа бэриллибиттэр. Силиэстийэ биллэрбитинэн, онно бурааннар суоллара баар. Онон бу күннэргэ саалары уонна бурааннары бэрэбиэркэлээһин бара турар.
«Мин санаабар саҥа саҕалаан эрэр булчуттар буолуохтарын сөп. Кинилэр түүн туундараҕа табалар туралларын көрөн, кыыл табалар дии санаан ытыалаабыт буолуохтарын сөп. Онтон чугаһаан дьиэ табалара буолалларын билэн, куттанан, атах биллэрбит буолуохтарын сөп», — диэн Павел Собянин сабаҕалааһыны оҥорор.
