18 Тохсунньу 18.01
  • -48°
  • $ 73,82
  • 83,32

Тиит арыылар бильярды улаханнык биһирииллэр

12:40, 12 августа 2016

Хаҥаласка Тиит Арыы нэһилиэгэр «Оптимист» диэн бильярды таптааччылар кулууптара 2009 сылтан үлэлиир. Кулуубу «Эркээйи» култуура киинигэр куруһуоктары сүрүннээччи, нэһилиэк дьокутаата Людмила Федорова сатабыллаахтык салайар.


«Кулууп эр дьону түмэр, сомоҕолоһуннарар, тэрээһиннэргэ көхтөөхтүк кытыннарар сыаллаах-соруктаах тэриллибитэ. Онон нэһилиэкпит эр дьоно кулууптанан сэргэхсийэ түспүттэрэ. Култуура киинин иккис мэндиэмэнигэр киинэ эргэ будката кураанах турбутун ыраастааннар, өрө тарданнар бильярдыыр хос оҥоро охсубуттара. Билигин «Оптимиска» 30-ча киһи сылдьар. Ону сэргэ, оскуола оҕолоро сөбүлээн дьарыктаналлар. Өссө элбэх киһи түмсүөҕүн, күрэхтэһиилэрбитин өссө кэҥэтиэхпитин, сайыннарыахпытын икки эрэ остуоллаахпыт атахтыыр», — диир кини.

Людмила Ариановна бастакы сылларга күрэхтэһииттэн дьон сатаан оонньуохпут суоҕа диэн куттанан аккаастанар буоллаҕына, билигин үөрүүнэн кыталларын этэр. Маныаха СӨ бильярд спордун Федерациятын кытта ыкса сибээстээх үлэлииллэрэ, онтон бастыҥ оонньооччулар кэлэн маастар-кылаастары биэрэллэрэ улахан тирэх, өйөбүл буоларын бэлиэтиир. Ону сэргэ, дьахталларга өрөспүүбүлүкэ чемпионката Мария Бельчусова сыл аайы анаан тиийэн олохтоохтору кытта бильярдаан улахан сэргэхсийиини таһаарарыттан, баҕалаахтары оонньуурга үөрэтэриттэн үөрэр. «Оптимистар» оонньуур маастарыстыбаларын үрдэтэн иһэр туһуттан өссө тэрилтэлэр, нэһилиэктэр икки ардыларыгар, улууска күрэхтэһиилэри тиһиктээхтик тэрийэллэрэ үгэс курдук буолбут. Онуоха  дьон умсугуйан дьарыктанара санааларын кынаттыыр. Хаһан эрэ дойдубутун ааттатар бастыҥ бильярдистар уһаарыллан тахсыахтара диэн эрэнэр. Үлэлэрин улуустааҕы спорт управлениета өйүүрүгэр махтанар.

0
0
Тутаах тыллар
18 января 18.01
  • -48°
  • $ 73,82
  • 83,32