Дьокуускайга муус устар 19 күнүгэр Таймыыр норуот айымньытын дьиэтин ИЗО уонна декоративнай-прикладной искусствотын отделын сэбиэдиссэйэ, Таймыыр хотугу норуоттарын национальнай таҥастарын пуондатын харыстааччы, долган култууратын төрүт билээччи Василий Батагай кэлэр.
Кини А.Е. Кулаковскай аатынан норуоттар доҕордоһууларын дьиэтигэр семинар, маастар-кылаас ыытыаҕа.
«Василий Батагай хотугу норуоттар национальнай таҥастарын туһунан кэпсиэҕэ, атылыыларын, уратыларын. Лекцияларыгар орнамент, сиик, тигии туһунан билиһиннэриэҕэ. Кини бэйэтин кытта көстүүмнэри аҕалыаҕа, Национальнай художественнай музейга быыстапка туруоҕа», — диэтэ норуоттар доҕордоһууларын дьиэтин сүрүннүүр исписэлииһэ Ольга Охлопкова.
Муус устар 20 күнүгэр долган норуотун сиэригэр, үгэстэригэр анаммыт тэрээһин буолуоҕа. Муус устар 21 күнүгэр долган таҥаһын тигиигэ маастар-кылаас, муус устар 23 күнүгэр Саха сиригэр олохсуйан олорор долган норуот ыччатын кытта көрсүһүү тэриллиэҕэ.
