Кыра кылааска үөрэнэр оҕолоох төрөппүттэр оскуолаҕа босхо аһылык талбатын (меню) оҥорорго кыттыахтарын сөп. Бу туһунан РФ үөрэҕириитин министиэристибэтэ иһитиннэрэр.
Маныаха төрөппүттэр оскуола талбатын оҥорор хамыһыйа састаабыгар киириэхтэрин баҕаралларын туһунан оскуола дьаһалтатыгар эбэтэр аһылыгы оскуолаҕа астаан аҕалар тэрилтэҕэ биллэриэхтээхтэр.
Санатабыт, дойду бэрэсидьиэнэ В.Путин тохсунньу ыйга Арассыыйа алын сүһүөҕүн үөрэнээччилэрэ босхо итии аһылыгынан хааччыллыахтаахтарын туһунан эппитэ. Премьер-министр Михаил Мишустин бэс ыйын 22 күнүгэр уураахха илии баттаабыта. Бастакы симиэнэҕэ үөрэнэр оҕолор сарсыардааҥҥы аһынан хааччыллыахтара, оттон эбиэт кэннэ үөрэнээччилэр – босхо итии эбиэтинэн.
