13 От ыйа 13.07
  • 22°
  • $ 87,74
  • 95,76

Төрөөбүт тыл уонна сурук-бичик күнүнэн Ил Дархан эҕэрдэтэ

09:43, 13 февраля 2021
Текст:
Читайте нас на
Яндекс Новости
ЯДВ

Ытыктабыллаах Саха сирин олохтоохторо! Саха Өрөспүүбүлүкэтин салалтатын уонна тус бэйэм ааппыттан бука барыгытын Төрөөбүт тыл уонна сурук-бичик күнүнэн ис сүрэхпиттэн эҕэрдэлиибин!


Саха суругун-бичигин төрүттээччи, уһулуччулаах учуонай, сырдатааччы, тыл үөрэхтээҕэ Семен Андреевич Новгородов күн сирин көрбүт күнүгэр биһиги төрөөбүт тылбытыгар сүгүрүйэбит, ийэ тылбыт улуутун туойабыт, кэрэтин кэрэхсиибит, төрүт дьоммутунан киэн туттабыт.

Төрөөбүт тыл биһиэхэ өбүгэбит мындыр өйүн-санаатын тиэрдэр, норуот култууратын, духуобунай сыаннастарын иҥэринэ сылдьар, биһигини сомоҕолуур, күүспүтүгэр күүһү эбэр, инникигэ эрэли түстүүр барҕа баайбыт буолар. Хас биирдии көлүөнэ бэйэтин ыччатыгар төрөөбүт тылга тапталы иҥэрэн бу туохха да кэмнэммэт күндү баайбытын хаҥатар, өлбөт үөстүүр.

Элбэх омуктаах дойдубут тыл эгэлгэтинэн олус баай. Ол курдук, Россия Федерациятын Конституцията дойду бары норуоттарыгар төрөөбүт тылы чөл хаалларар, үөрэтэр уонна сайыннарар усулуобуйаны тэрийэр быраабы мэктиэлиир.

Өрөспүүбүлүкэҕэ элбэх тылы дьүөрэлиир үөрэх уонна иһитиннэрии эйгэтин олохтуурга улахан болҕомто ууруллар. Саха сирин норуоттарын тылларын чөл хаалларыы, үөрэтии уонна сайыннарыы тус сыаллаах судаарыстыбаннай бырагыраамата олоххо киллэриллэр. Оҕолору төрөөбүт тылынан үөрэтэргэ научнай, методическай төрүттэри, тэрээһини тупсарар үлэ ыытыллар. Биир сүрүн хайысханан төрөөбүт тылы сыыппара эйгэтигэр киллэрии буолар. Тыллар сайдыыларын өйүүр инниттэн Национальнай бэчээт күнэ олохтонно. Маассабай ааҕыыны өйүүр үлэ салҕанар, төрөөбүт тылынан кинигэлэр бэчээттэнэллэр. Онуоха Саха сирэ Россия саамай ааҕар эригийиэнэ буолбутун бэлиэтиир тоҕоостоох.

Бүгүҥҥү үөрүүлээх күҥҥэ төрөөбүт тылы уонна литератураны киэҥник тарҕатыыга, ыччаты өй-санаа өттүнэн иитиигэ үлэлии-хамсыы сылдьар биир дойдулаахтарбытыгар махталбын тиэрдэбин. Төрөөбүт тылга харыстабыллаах сыһыан – хас биирдиибит ытык иэһэ. Күүспүтүн түмтэхпитинэ эрэ төрөөбүт тылбыт ырааһын, уратытын чөл хаалларыахпыт.

Күндү Саха сирин олохтоохторо! Бары саҕалааһыннаргытыгар ситиһиини, айа-тута, үүнэ-сайда тураргытыгар баҕарабын! Чэгиэн-чэбдик сылдьыҥ, этэҥҥэ буолуҥ!

Айсен Николаев, Саха Өрөспүүбүлүкэтин Ил Дархана                   

Следите за самым важным и интересным в Telegram-канале и WhatsApp-группе ЯСИА