Сылын аайы Саха сиригэр икки тыһыынчаттан тахса киһи рак ыарыытынан ыалдьара бэлиэтэнэр. Итинтэн биир тыһыынчаттан тахсата өлөр. Бу туһунан өрөспүүбүлүкэтээҕи онкодиспансер суруйар.
Өрөспүүбүлүкэтээҕи онкодиспансер иһитиннэриитинэн Саха сиригэр онкологиянан ыалдьыы дойду атын эрэгийиэннэрин кытары араа-бараа. 10 сыл иһигэр ыалдьааһын 31,3 % үрдээбит. Сыллата өрөспүүбүлүкэҕэ икки тыһыынчаттан тахса киһи онкологиянан ыалдьыбыта бэлиэтэнэр.
Дьон үксүн тыҥа, түөс, куртах, суон оһоҕос, бүөр, быар, матка, тирии, былчархай ыарыыларынан ыалдьар. Ыалдьааччы орто сааһа 55 – 69.
Өлүү көрдөрүүтэ эмиэ үрдүк. Сыллата биир тыһыынчаттан тахса киһи рак ыарыытыттан өлөр. Ордук тыҥа, куртах, быар, ноор, түөс рагыттан өлөллөр.
«Доруобуйа харыстабыла» национальнай бырайыак көмөтүнэн онкодиспансер 2019 – 2020 сылларга 428 мөл сууммалаах тэрил ылбыт. Барыта 51 араас тэрил турбут. Быйыл 106 мөл солкуобайга эбии тэрил ылыллара былааннанар.
Икки бүтэһик сылга улуустарга 13 онкология кииннэрэ аһылыннылар. Быйыл Аммаҕа уонна Үөһээ Бүлүүгэ итиэннэ 18 атын улуустарга кииннэр аһыллаллара былааннанар.
Онкопоисксаха.рф бырайыагынан былырыын балаҕан ыйыттан барыта 8492 киһи доруобуйатын туругун бэрэбиэркэлэннэ. Үс киһи ыалдьыбыта бигэргэннэ, 154 киһини учуокка ыллылар.
Маны таһынан, «Өрөбүл күннээҕи онколог сүбэтэ» бырайыак, мобильнай биригээдэлэр үлэлииллэрин, рагы эрдэ булууга көмөлөөхтөрүн туһунан өрөспүүбүлүкэтээҕи онкодиспансер иһитиннэрэр.
