Бу сылтан Сунтаар нэһилиэгэр 90 саастарын туолбут кырдьаҕастарга Ытык бэлиэнэн чиэстиир буоллулар. Нэһилиэк баһылыга Эдуард Филиппов үбүлүөйдээх дьону көрсөн Ытык бэлиэни туттартыыр. Бу бэлиэ тоҕус таастаах, биир тааһа уон сылы туоһулуур.
От ыйын саҥатыгар улахан дьиэ кэргэн күн күбэй ийэтэ, эйэҕэс эбэтэ, хос эбэтэ, Дьоруой Ийэ, үлэ, тыыл бэтэрээнэ, Элгээйи нэһилиэгин Бочуоттаах гражданина, Сунтаар нэһилиэгин олохтооҕо Егорова Мотрена Наумовна 90 сааһын туолбутун чиэстээтилэр. Ытык киһи оҕолорун, сиэннэрин кытары үөрэн-көтөн бэйэтэ олохтоох дьаһалтаҕа кэлбитэ хайҕаллаах.
Эдуард Егорович Сунтаар нэһилиэгин дьаһалтатын аатыттан Мотрена Наумовнаны, оҕолорун, сиэннэрин, хос сиэннэрин, бары аймахтарын эҕэрдэлээн туран Ытык бэлиэни туттарда. Салгыы төрөөбүт нэһилиэгин, улууһун, өрөспүүбүлүкэ социальнай сайдыытыгар улахан кылаатын иһин Саха Өрөспүүбүлүкэтин Ил Дархана Егор Борисов ыыппыт эҕэрдэ суругун, Москваттан Кремльтэн кэлбит кэмбиэрдээх суругу тиксэрдэ.
Мотрена Наумовна кэргэнинээн Митрофан Алексеевичтыын өр сылларга Элгээйигэ олорбуттара. Онон өрөгөйдөөх күҥҥэ Элгээйи нэһилиэгин баһылыгын солбуйааччы Олег Попов эҕэрдэ эттэ.
Мотрена Наумовна эҕэрдэлии кэлбит дьоҥҥо бэйэтэ эмиэ сэмэй бэлэхтээх кэлбит. Быысапканан салфеткалары, кылынан оҥоһуллубут харысхалы бэлэхтэтэлээтэ.
Егоровтар уон оҕону төрөтөн, үөрэхтээн, үлэһит дьон оҥортообуттар. Билигин кинилэр сыдьааннара бүтүн Саха сиринэн, бэл диэтэр, оннооҕор Америкаҕа тиийэ олороллор. Бары да көмүс тарбахтаах уус, айар талааннаах дьон. Мас, көмүс уустара бааллар, иистэн даҕаны, хаартыска эйгэтиттэн даҕаны хаалсыбатахтар.
