Сунтаар улууһун баһылыга Анатолий Григорьев көҕүлээһининэн, Нерюнгритааҕы мэдиссиинэ колледжын кытта сөбүлэҥ түһэрсиллибитэ. Ол түмүгэр технологическай колледжы 23 устудьуон фельдшер идэлээх бүтэрдэ.
Сунтаар улууһун медицинатын эйгэтигэр үлэлииргэ 23 эдэр фельдшер дипломнарын үөрүүлээх быһыыга-майгыга тутта. Бу тэрээһин улуус олоҕор история буолан хааларын Сунтаар улууһун баһылыгын социальнай боппуруостарга солбуйааччыта Мирослав Иванов бэлиэтээтэ. Кини эдэр исписэлиистэр улуус доруобуйа харыстабылын сайдыытыгар саҥа күүс-көмө буолалларын уонна нэһилиэктэргэ мэдиссиинэ көмөтө өссө таһымнаах буоларыгар олук ууралларын эттэ.
Үөрэх хаачыстыбата үрдүгүн туоһулаан, 10 устудьуон үөрэҕин туйгуннук бүтэрэн, кыһыл диплом ылла.
Диплом туттарыытын саамай долгутуулаах өрүтүнэн эдэр исписэлиистэр мустубут дьон иннигэр ытык андаҕардарын ааҕан иһитиннэриилэрэ буолла. Кинилэр киһи олоҕун уонна доруобуйатын туһугар чиэстээхтик үлэлиэхпит диэн андаҕар биэрдилэр. Түмүккэ кинилэри иитэн-такайан, олох киэҥ суолугар таһаарбыт күндү учууталларыгар, уһуйааччыларыгар уонна улуус салалтатыгар муҥура суох махталларын эттилэр, суруйда Сунтаар улууһун дьаһалтатын пресс-сулууспата.
